Укунсса цIанилусса фестиваль-форум най дия жулла республикалул шагьрурдай майрал 27-29-нний. Ва цурдагу хьунни творчествалул ва аьдатирттал Щалагу Аьрасатнал лагрулийсса «Вместе мы – Россия» цIанилусса фестиваль-байрандалул лагрулий. Культуралул фестивальданул дайдихьу хьунни Дарбантлив, Нарын-Къалалий ва Дунияллул культурардал ва диннал тарихрал музейраву.
Нарын-Къалалий ккаккиялун тIитIин бувну бия халкьуннал (хъунмурчIин Кьиблалул Дагъусттаннал районналсса) аслийсса культуралул майданну. Хъамал хьунабакьлай бия фольклорданул группарду. Шиккува буллай бия халкьуннал канил пишардал мастер-классругу. Вайннувух гъирарай гьуртту хъанай бия туристъталгу.
Гихуннай хьунаАьрасатнал регионнаясса ва Дагъусттаннал Кьиблалул районнаясса творчестволул коллективру гьурттусса хъуннасса концерт.
Вара кьини, майрал 27-нний, Дарбант шагьрулийсса Дунияллул культурардал ва диннал тарихрал музейраву хьуна «Сохранение, развитие и актуализация традиционной культуры народов России» тIисса ккуркки стол. Шикку модераторну бия искусствовед, «Заповедники» тIисса экоцентрданул (ш. Москав) эксперт Яна Малиновская.
Спикерталну бия ХI. ЦIадассал цIанийсса Мазрал, литературалул ва искусстволул институтрал отделданул хъунмур Эльмира Аьбдуллаева ва ДР-лул Музыкантътурал союзрал председатель Хан Баширов. Ххал бигьлай бия Дагъусттаннал аслийсса музыкалул искусстволул аьдатру дуруччаврийн, хьхьичIуннай шаврийн багьайсса масъалартту.
Хъиривмур кьини МахIачкъалалив хьуна «Кьиблалул зунттурдая ухссавнил хьхьирирдайн бияннин» тIисса цIанилусса телемост. Ванил цачIун бувна ва кьини кIива шагьру — МахIачкъала ва Мурманск.
Майрал 29-нний МахIачкъалаллал хъун майданнив хьуна фестивальданул гала-концерт. Ва дачин дурну бия Арсен ЛухIуев ва Мурманскалиясса Юлия Гапонова.
Фестивальданий бувккуна Аьрасатнал Федерациялул культуралул министр Ольга Любимовал цIаниясса махъру.
СахIналийн бувккуна ва ихтилатру бувна Аьрасатнал ПаччахIлугърал халкьуннал творчестволул къатлул директор Тамара Пуртовал ва Дагъусттан Республикалул культуралул министр Зарема Буттаевал.
