[dropcap]М[/dropcap]ахIачкъалалив Поэзиялул театрдануву Дагъусттан Республикалул культуралул министр Зарема Буттаева хьунабавкьунни региондалул, щалагу Аьрасатнал, дунияллул халкьуннал дянивсса лагрулул конкурсирттал лауреатътал хьусса оьрчIащал ва вайннал педагогтуращал.
Жулва чIава балайчитал, къавтIалт, музыкантътал, художниктал, циркачтал ва цаймигу гьунардучитал Ухссавнил Ккавкказуллал Федерал округрай ва билаятрал личIи-личIисса регионнай цимивагу шагьрулийн бивну бур, лажин кIялану, ккавкнан хъамакъабитанну ккаккан бувну бур личIи-личIисса кIанттурдай аьзизсса Дагъусттан.
Зарема Буттаевал республикалул магьирлугъраву ва маданиятраву цалламур даврил лайкьсса бутIа бихьлахьисса оьрчIан ва вайннал педагогтуран дуллунни Министерстволул чулухасса ХIурматрал грамотартту ва Барчаллагьрал чагъарду, мукунма ДР-лул Халкьуннал Мажлисрал депутат, мудангу укунсса оьрчIал чIарав ацIлацIисса Муслим Гиндиевлул цIаниясса бахшишру (арцуйнуссагу). ОьрчIал цала чулухасса бахшишну ва кьини ккаккан бунни музыкалул номерду. СахIналийн бувкминнавух бия цIуллу-сагъшиврул ссуссукьуссагу, СВО-лий цалва бурж биттур буллалиминнал кулпати рттавассагу.
«Школьниктурансса культура» проектрал Щалагу Аьрасатнал «Расул ХIамзатов оьрчIал ярунних» тIисса акциялий ххув хьуминнан ва хасъсса бахшишран лайкь хьуминнан шаэрнал душ, Дагъусттаннал Изобразительный искусстварттал музейрал директор СалихIат ХIамзатовал дуллунни бахшишру ва миллатирттал мазурдий бувксса Расул ХIамзатовлул луттирду.
Ва кьини бахшишру дуллуна 42 дуклаки оьрчIан ва 31 педагогнан. Вайннавух бия жула кказитрай цая уттинин чивчуссагу, чичин бувассагу лакку оьрчIругу, педагогталгу.
