[dropcap]М[/dropcap]ахIачкъалалив хьунни шахматрай буккаврил Дагъусттаннал Кубокрал шамилчинмур этап. Шикку гьуртту хьунни 9,11,13 шиннардивусса оьрчIру ва душру, мукунма 15-17 шиннардивун бияннинсса чIаважагьилтал. Бяст-ччал хас бувну бия чIявусса хьхьичIунсса шахматистал хIадур бувсса цIа дурксса тренер, Бархъаллал шяравасса Кьадир Исмяиловлул аьпалун.

Турнирданий гьуртту хьунни Дагъусттаннал личIи-личIисса районнаясса ва шагьрурдаясса 200 спортсмен. Миннавух бия уттинин республикалул ва регионнал дянивсса бяст-ччаллаву ххув хьуссагу. Турнирданул сакиншинначитал хьунни Да­гъусттаннал шахматирттал федерация, А.Карповлул цIанийсса Шахматирттай буккаврил спортрал школа ва Кьадир Исмяиловлул гъан-маччами.

Турнирданул гьурттучитал барча буллалисса ихтилатру бунни Дагъусттаннал шахматирттал федерациялул президент, гроссмейстер Джакай Джакаевлул, ФИДЕ-лул мастер Тата Бариевлул ва Кьадирдул гъанчувнал.

Ххув хьуминнан ва призертуран буллунни дипломру ва медальлу. Ххув хьуминнан мукунма буллунни дакIний личIансса кубокру.
Турнирданул лагрулий А.Кар­­повлул цIанийсса Шахма­тирттай буккаврил спортрал школалий тIивтIунни «Цалчинминнал суккушинна» тIисса Мюрщи оьрчIал ва жагьилтурал Аьрасатнал суккушиннарал отделение. Шикку гьуртту хьун бувкIун бия «Цалчинминнал су­ккушинна» тIисса Да­гъусттаннал отделениялул хъунаманал хъиривчу Екатерина Абакарова, А.Карповлул цIанийсса спортрал школалул директорнал хъиривчу Саният Шахбанова ва СССР-данул спортрал мастер Руслан ХIусайнов.
Турнирданул хIасиллу дуллай, дунияллул халкьуннал дянивсса гроссмейстер Джакай Джакаевлул кIицI лавгунни тIур­кIурду лавайсса даражалий лавг­шиву.