ГьунчIукьатIув

Муданма кунма, хъинну ххуйну хIадур хьуну бия ва шадлугърайн ГьунчIукьатIрал дянивмур даражалул школалий.

[dropcap]Ш[/dropcap]адлугъ дайдихьлахьисса ихтилат бувна школалул директор Малик Къушиевлул. Гихунмай ихтилатру бувна шяраваллил бакIчи МухIад Штанчаевлул, райондалул администрациялул чулуха КьурбанмахIаммад Дандамаевлул, гьашинусса выпускирттал (9-мур ва 11-мур) классирттал оьрчIал цалчинсса учительтал Асият Дандамаевал ва Тамара Ибрагьимовал, классир­ттал каялувчитал Жавагьи Штанчаевал ва Роза Ибрагьимовал ва чIявусса цайминналгу. Дуккавриву хьхьичIунминнан дуллуна грамотартту. Учительтурал ва дуклаки оьрчIал ва кьинилийннин хIадур дурну дия ххишала дакъа авадансса программа.

Гьашину Гьунч1укьат1рал дянивмур даражалул школалул школалул 11-мур класс къуртал буллай ур 3 оьрчIал, 9-мур – 7 оьрчIал. Школа къуртал буллали­сса 3 оьрчIава 2 ккаккан увну ур мусил медальлан – ПатIимат Парханова ва Аймисай Сулайманова. ПатIиматлул язи дургьуну дур обществознаниялул ва тарихрал экзамен, ванин пикри бур юрист хьун­сса. Аймисайл, хIакин хьун­сса хияллай, язи дургьуну дур химия, биология. Нураттин МахIаммадовлул язи дургьуну дур биология, ва уххан ччай ур шяраваллил хозяйствалуцIун бавхIусса вузравун.

КIундив

КIундиннал дянивмур даражалул школалий 11-мур класс къуртал буллай ур 10 оьрчI. Щалвагу билаятрай кунма, вайннангу рирщунни Махъра-махъсса занг.

[dropcap]В[/dropcap]ыпускниктал барча буллалисса, вайннан экзаменнайгу, гихуннайсса дуккавривугу, оьрмулувугу тIайлабацIу чIа тIисса махъру лавхъуна Лакрал райондалул каялувшиннарал чулуха Амсар Къажлаевлул, КIундиннал шяраваллил администрациялул бакIчи МахIаммад МахIмудовлул, школалул директор Абакар Гуйдалаевлул, завуч ПатIимат Оьмаровал, гьашинусса 11-мур классрал выпускрал цалчинсса учитель Лена Уздановал, шяраваллил культуралул къатлул директор Даниял ХIажиевлул, учительтурал.

АцIния царагу шинал дянив цалва оьрчIал цIаний був­сса захIматрахлу учительтурахь барчаллагь тIутIисса махъру лавхъуна нитти-буттал ва цалва выпускниктуралгу. Дуккавриву хьхьичIун ливчуминнан дуллуна грамотартту.

Школалул гьашинусса выпускрал классрал каялувчи Ху­цIаева Миясат Ибрагьимовнал каялувшиндарай ва кьинилийн хIадур дурну дия ххаллил­сса программа.