ЦIийшиял шяраваллил школалун дирзунни ДР-лул лайкь хьусса учитель ХIасанов ХIасанчалаби Загъалавл арснал цIа. КIицI лаган багьлай бухьунссар ХIасанчалаби 35 шинай ва школалул директорну зий ивкIшиву. Ва хIукму бувну бур школалул педколлективрал октябрьданул 4-нний 2022 шинал. Гьашину тIурча, райондалул администрациялул бакIчи Шамил Рамазановлул чулийн буккан бувну бур.
[dropcap]М[/dropcap]уницIун бавхIуну вай гьантрай ЦIийшиял шяраву хьунни мажлис. Миккун бавтIун бия жямат, гъан-маччами, даврил уртакьтал, дустал ва дуклаки оьрчIру.
Учительтурал, шяравучутурал, гъанчунал, школалул личIи-личIисса шиннардийсса выпускниктурал, арх1ал дуклай бивкIминнал дакIнийн бивчуна учительнал оьрмулувасса лахIзарду. Цинявннал ца зумату кунма кIицI лавгуна ванал цаярагу, цайминнаягу цуксса тIалавшинна диркIссарив, чIурчIав дунни ХIасанчалабил кумаграйну ЦIийшиял школа райондалул школарттаву ккаккиялунну бивкIшиврий.
Итххявхсса учительнал, хIакьсса тарбиячинал, ххирасса буттал пиша ирсирай бивну бур душ Ламара Маммаевайн. ЦIана ва бур школалул директорну.
Учительтурал пиша щархъай мудангу хIурматрай бивкIссар. Школалул чIирай ХIасанов ХIасанчалабил мармарчарил ула лачIун бувкIун бия администрациялул бакIчинал хъиривчу Ажуб ХIусманов, АьФ-лул ПаччахIлугърал Думалул депутатнал кумагчи Смит Расулов, ДГМУ-лул педиатриялул факультетрал декан МахIаммад МахIаммадов, ДР-лул лайкь хьусса юрист Ризван ПаттахIов ва м.ц. Вайннал цинявннал лахъа-хъунсса мукъурттийну ва барчаллагьрайну кIицI ларгуна муаьллимнал цIа. Дуклаки оьрчIал дурккуна учительнан хас дурсса назмурду, хIадур дурну дия культуралул программа.
Увну ур ХIасанчалаби майрал 20-нний 1942 шинал ЦIийшиял шяраву. Ванал ппу, Хъун дяъвилул гьурттучи, ивкIуну ур Курскаллал дугалий. Буттал шяраву байбихьулул школагу къуртал бувну, ХIасанчалаби дуклан лавгун ур Вихьуллал арулва класс бусса школалийн, хъиривми классру бувккуну бур Ккуллалмур школалий. 1959 шинал ва дуклан увххун ур Хасавюртуллал шяраваллил хозяйствалул техникумравун. Вагу къуртал бувну, Крупскаял цIанийсса колхозраву бухгалтерну зий ивкIун ур. 1962 шинал увххун ур МГУ-лувун, тарихрал факультетрайн. Мура шинал увцуну ур армиялийн.
1967 шинал, демобилизациялул хьуну махъ, ва цIунилгу увххун ур МГУ-лул философиялулмур факультетрайн. Шичча ва тIайла увккун ур Днепропетровскаллал кооператив институтравун преподавательну. Амма, нину къашавай хьуну, занахьуну ур шяравунай. Ккуллал райондалий ОНО-рай зун ивкIун ур.
1973 шинал ЦIийшиял байбихьулул школалия бувну бур мяйра шинал школа. Му шинал школалул директорну ивтун ур ХIасанчалаби, 35 шинай микку зийгу ивкIун ур.
Школалий зузиссаксса хIаллай ванал хIалал дурну дур чIярусса наградартту ва Барчаллагьрал чагъарду. Дур ванал ЗахIматрал ЯтIул ттугълил орден, «РСФСР-данул ва СССР-данул халкьуннал просвещениялул отличник» тIисса лишанну, РСФСР-данул, ДАССР-данул чулухасса ХIурматрал грамотартту. Ва ур ДР-лул лайкь хьусса учитель, цимилагу хьуну ур «Учитель года» тIисса цIанил заллу.
