[dropcap]М[/dropcap]ай зурул 23-нний Дагъусттаннал БакIчи Сергей Меликовлул халкьуннал шаэр Расул ХIамзатовлул 100 шинал юбилейрайнсса хIадуршинна цукун най дурив ххал дигьлагьисса ирглийсса заседание дунни. Ванал бувсунни Москавлив Измайловский паркраву ххуйсса даражалий ларгшиву шаэрнал юбилейран хас дурсса фестиваль, укунсса мероприятиярттал республикалул сий гьаз дуллалишиву ва агьали гъирарай гьуртту хъанай бушиву юбилейрал шадлугъирттай.
Юбилейрал мероприятияртту шинал мутталий дикIантIий дур, Аьрасатнал Мажлисрал Федерациялул советрайгу дикIантIий дур Расул ХIамзатовлул кьинирду. Балжийну вай мероприятиярттая буслай, Республикалул ХIукуматрал хъунаманал хъиривчу Муслим Телякавовлул кIицI лавгунни июньдалул 7-нний Федерациялул советрал къатраву Расул ХIамзатовлул мукъурттийсса балайрдал концерт ккаккан дувантIишиву, тиккура шаэрнал луттирдал выставкагу дикIантIишиву. Дагъусттаннал Информациялул ва печатьрал агентствалул хъунама Аьбдуразакь Жамалуттиновлул бувсунни шаэрнал юбилейран хасну итабавкьусса цIусса луттирду Москавлив ЯтIул Майданнив хьунтIисса луттирдал фестивальданий бикIантIишиву.
Ва выставкалий луттирду бакъассагу, бикIантIий бур «ЦIадатусса кавказчу» тIисса фотоальбомгу, цурда фестивальгу хьунтIий дур июнь барз байбивхьусса гьантрай. Ккаккан дунни ванал Расул ХIамзатовлул оьрмулул ва творчествалун хас бувсса сайтрал макет, бувсунни ва сайтрай шаэрнал оьрмулул ххуллия, творчествалия балжийсса информация бикIантIишиву, ванал цалчинсса назмурдая тIайла хьуну, сайки щалла творчествагу, документал журалул суратру, видеоматериаллу. Сергей Меликовлул чIурчIав дунни, сайтрал даву юбилей къуртал хьуну махъгу дацIан дуван ритан къабучIишиву. Заседание къуртал дуллай, Меликовлул бувсунни Сакиншиннарал комитетрал хъиривмур заседание июнь зуруй хьунтIишиву ва дурмунил хIасиллу дувантIишиву.
