Аьралитурах буруган бувкIунни

Хизри АьвдурахIмановлущал

[dropcap]В[/dropcap]ай гьантрай Москавливсса лакрал диаспоралул вакилтал бувкIунни Химкилийсса Вишневскийл цIанийсса госпитальданул 2-мур филиалданийн, хасъсса аьралий операциялуву щавурду дирсса аьралитурачIан биян.

[dropcap]Ш[/dropcap]иккун бувкIминнавух бия «Дагъусттан» МЦК-лул Медициналул зузалтрал ассоциациялул каялувчи, психологиялул элмурдал кандидат Гулизар Башанаева, Филатовлул цIанийсса 15-мур азарханалул реанимациялул отделениялул заведующий ХIусман ХIусманов, фельдшер-лаборант Ххадижат Ц1аххаева, Аьрасатнал Федерациялул ПаччахIлугърал Думалул депутат Хизри Абакаровлул кумагчи, хьхьичIунсса инженер Рамазан Хайдакьов, «Национальное объединение строителей» ассоциациялул канцеляриялул хъунмур Рамелла Хайдакьова. Дагъусттаннал халкьуннал дукрардащал ва нахIу-нацIу дусса кьуцурттащал вай бивунни госпитальданул кIива корпусраву хъин хъанахъисса сайки 10 аьраличуначIан.

[dropcap]М[/dropcap]иннавух бур дагъусттан оьрчIру (рутул, лазги, къумукь, табасаран), чачан, татар, оьрус. Хаснува ва госпитальданийн бучIан пикри хьуну бур, шикку чIявусса дагъусттан оьрчIру бур тIий бавну. Диаспоралул вакилтал хьунабавкьунни Дагъусттаннаясса 26 шинавусса Хизри АьвдурахIмановлущал (Буйнакскаллал район), МухIам­мад МахIаммадовлущал, Наби Койчакаевлущал, ТIагьир ХIажибалаевлущал (Дарбантуллал район), Мейлан Каибовлущал (Каспийск), Малик Исмяиловлущал (Табасараннал район), Тюменнал областьраясса татар Фархад Карымовлущал, мукунма ясирну агьну ивкIсса оьрус оьрчIащал. Аьралитурал бувсунни цала бакIрачIан бувкIмур. Вайннахь цIуллу-сагъшиврул тагьардания, кумаг аьркин багьлагьисса масъаларттая цIухху-бусу бунни. Ихтилатру хьунни бюххансса, иттав макь дукIлакIисса. Иш багьний оьвчин диаспоралул вакилтурал аьралитурахьхьун буллунни цала телефоннал номерду.
Аьралитал барчаллагьрай бия цахара дурсса аякьалухлу.

ДакIнийн бутан, Дагъусттаннал диаспоралул вакилтал цалчин бакъар хасъсса операциялуву щавурду дирминначIан бивсса. Ларгсса шиналгу Гулизар Башанаева бакIчисса хIакинтурал группа бувкIссия Вишневскийл цIанийсса госпитальданийсса аьралитурачIан.
Укунсса хьунабакьавурттал аьралитурал дакI дувай, ватанлувтал бучIаврия, миннан цивппа дакIнийн багьаврия вай ххари шай.