Щардал школалий

[dropcap]М[/dropcap]айрал 8-нний щала республикалий хьусса акциялул лагрулий Щардал школалийгу тIиртIунни аьпалул ула.

[dropcap]Ш[/dropcap]икку дуклай ивкIссар Украиннал аьрщарай нанисса хасъсса аьралий операциялий чувшиврий жан дуллусса Жамалуттинов МахIаммад Жамалуттиннул арс.
Ва иширан хас дурсса мероприятиялий гьуртту хьунни Лакрал райондалул администрациялул ва идарарттал зузалт, учительтал, дуклаки оьрчIру, МахIаммадлул гъан-маччами.
Украиннал аьрщарай Аьрасатнал буллалисса хасъсса аьралий операциялия, микку талатисса жула оьрчIая, Лакрал райондалул дуллалисса гьурттушиндарая бувсунни райондалул бакIчи Юсуп МахIаммадовлул. МахIаммад Жамалуттиновлуя бувсунни учительтурал, дуклаки оьрчIал.

[dropcap]М[/dropcap]ахIаммад Жамалуттинов увну ур 1989 шинал мартрай. УрчIва класс къуртал баннин дуклай ивкIун ур Щардал школалий. Къуллугъ буллай ивкIун ур контрактрай Кьиблалул Аьса­тIиннаву.

Сержант Жамалуттиновлул чувшиврий жан дуллуну дур августрал 20-нний Запорожскаллал областьрайсса Васильевка шяравусса талатавриву.
Хасъсса аьралий операциялий ккаккан дурсса къучагъшиврухлу, Аьрасатнал Президент Владимир Путиннул Указрайн бувну, чIивима сержант Жамалуттинов лайкь хьуссар Чувшиврул ордендалун.