Хъурдаккаврил кьини Ккурклив

[dropcap]И[/dropcap]нттухуннай, хъу-лухччи дугьайсса чIун гъан хьувкун, сайки цинярдагу лакрал щархъаву дувай аьдатравун дагьсса Хъурдаккаврил байран. Гурну, тяхъану ларгунни байран Ккурккуллал шяравугу.

Байрандалийн бувкIун бия личIи-личIисса шагьрурдай ялапар хъанахъисса ккурккулгу, чIявусса тиха-шихасса хъамалгу. Гьашинусса жул байрандалул ляличIишиву ва хьуна — акъая кьуру лавсъсса хъузала. Амма, ччянияцIара дайсса жула аьдат лях гьан къаритан, маслихIат ккавккун, лагма лавгуна щарнил жямат. Ва даву цала бакIрайн ларсми цаннаяр ца ялтту буккан ччайяв къакIула, байран хъиннурагума ххуйну хьунни. Жяматрал дуллалимуницIун кабакьу бунни шяраву хъанахъисса иширттал чIарав мудан ацIайсса СалихI ХIажиевлулгу.

Хъарас щаврил байрандалия ва жула аьдатирттая бусласи­сса, жямат барча буллалисса ихтилатру бувну махъ бивхьунни аьрщарайх цалчинсса хъарасрал ща, бивщунни къама. Баргъ-гъарагъи дакьиннав, хъу-лухччи дюхъаннав, гьарица къушлий барачат ликканнав тIий, дуаьрду дунни оьрмулул хъуниминнал. Къурату яла цинявппа зана хьуна щарнил ккурчIайн. Шикку хьуна спортрал бяст-ччаллу: лечаву, тIанкI учаву, пут гьаз даву ва личаву, архъандалийх лахъаву ва м.ц.

Вай бяст-ччаллаву хьхьичIунсса кIанттурду бувгьуминнан бахшишран дулун ччянира заказ дурну дия медаллу ва «Куркли» тIий чивчусса футболкарду. Шяраваллил инсантурайн тапшур дурну, дурну дия бартри. Дагъусттаннал ххассал бувултрал кьюкьлул чулуха дуркIун дия формарду. Ми дакъассагу, байран тIайла дуккан вайннал бувну бия арцуйнусса кумаггу. Мероприятиярттал сакиншинначину ия Данияллул арс Роберт Магьдиев.

Шадлугърал мажлисрайн тIай­ла авцIуна отпускалий шяравун увкIсса хасъсса аьралий операциялуву гьуртту хъанахъисса Тимур КьурбанмахIаммадов.
Ахирданий цинявппа авадансса ссупралухун бавтIуна.