МахIачкъалаллал мэр Ризван ГъазимахIаммадовлул республикалул хъуншагьрулий яхъанахъисса ветерантуравух барча унни Вилттащиял шяравасса МахIаммад Къудаевгу.
«МахIачкъалаллал бусравсса гражданин, фронтовик, МахIаммадлул арс МахIаммад Къудаев увну ур 1922 шинал июньдалул 5-нний Вилттащиял шяраву.
[dropcap]Ш[/dropcap]кола къуртал бувайхту ванан учительнал касму лахьхьин ччан бивкIун бур. Шяравусса школалийгу зий, Педагогикалул институтравун дуклан увххун ур. Дяъви байбишайхту, ва чувшиврий дяъвилул цIаравух увккун ур. Хъунама сержантнал чиндалуву, битултрал личIисса 95-мур батальондалул талаталал Ххувшаврил кьини Германиянаву хьунадаркьуну дур. Ва лайкь хьусса наградарттавух дур ЯтIул Ттугълил, Чувшиврул орденнугу, Буттал кIанттул цIанийсса Хъунмасса дяъвилул 2-мур даражалул орденгу.
Жу дакIнийхтуну барча уллай буру МахIаммад МахIаммадович ва цIуницIагу ванащал ххарину хьунабакьин ссавур дакъа буру: чIал къархьуну ванан 101 шин хъанахъиссар», – укун чивчуну бур МахIачкъалаллал администрациялул хъунаманал цала Телеграм-каналданий.
Жугу барча уллай буру бусравсса фронтовик. Ва 101 шин шаврищал барча увангу мэрнаяр махъун къабагьан махъ буллай буру.
