Дагъусттаннал Дуккаврил ва элмулул министерствалул абитуриентътуран баян бунни цIушиннардая. Гьашинуния тийнмай вузирдавун дуклан буххан ччиминнан ккаккан буллалиссар квотардал шанма жура.

Специальная квота – ва аьралитурал ва аьрайн бувцуминнал, хасъсса аьралий иширттаву гьуртту хьуминнал оьрчIанссар. Бюджетрал кIанттурдаву ва квоталун 10 % ккаккан бувну бу­ссар. КIилчинмур журалийн особая квота тIий бур, ва мушакъатминнансса ва ятинтурансса квотар. Ванингу бюджетрава 10 % кка­ккан буллалиссар. Шамилчинмур жура – целевая (аьщуйн щуну учин, квота на целевое обучение). Ва паччахIлугъран чара бакъа аьркинсса касмурду лахьхьин ччиминнанссар: педагогтал, хIакинтал, инженертал. Так ва квоталийну дуклан ув­хма вуз къуртал бувайхту цува дуклан тIайла увксса идаралий зун аьркинссар шанна шинай. Зулва оьрчIру вузирдавун дуклан буххан хIадур хъанай бухьурча, уттива зунна дагьайсса квоталул хъирив буккияра.