Ларгсса тталаткьини Дагъусттаннал БакIчи Сергей Меликов гьуртту хьунни МахIачкъалаллал «Динамолун» ттуршра шин шаврицIун дархIусса шадлугърай.
Ва мероприятие хьунни Расул ХIамзатовлул цIанийсса Миллатрал библиотекалуву. Ваний гьуртту хьунни республикалул идарарттал хъуними, «Динамолул» вакилтал, тренертал, олимпий чемпионтал, спортрал ветерантал. Спортравусса хьхьичIуннайшивурттащал «Динамовцы» барча бунни республикалул вице-премьер Рамазан Жяъпаровлул, спортрал министр Сажид Сажидовлул ва цаймигу бусравсса къуллугъчитурал. «Динамолул» президент, Аьрасатнал лайкь хьусса тренер ХIажи ХIажиевлун Сергей Меликовлул дуллунни паччахIлугърал награда – шамилчинмур даражалул ХIурматрал орден. Наградартту дуллунни командалул капитан МутIалиб Аьлибаговлун ва вице-капитан Залимхан Юсуповлун, цаймигу тренертуран ва спортсментуран.
