Апрель зурул 7-нний Москавуллал Миллатирттал къатлуву тIиртIунни машгьурсса художник, педагог, профессор, техникалул элмурдал кандидат, СССР-данул Дизайнертурал сообществалул член, Педагогикалул кIулшивуртту дулаврил элмурдал дунияллул халкьуннал академиялул академик ХIусайн ХIусайновлул суратирттал выставка.

[dropcap]В[/dropcap]а Хъунатусса ур. 2021 шинал, ковидрал азардануща ххассал къавхьуну, лавгссия дунияллия. Ва выставкагу хIадур дурну дур Москавливсса Дагъусттаннал Культуралул центрданул сипталийну. Выставкалий ккаккиялун дирхьуну дур художникнал личIи-личIисса шиннардий дурсса суратру, чIяруми темардугу Дагъусттаннан хас дур­сса дур: зунттал тIабиаьт, бархъаллал тIахIунтту, канил пишакартурал дуваймур. Дур Ссивирливсса хьхьичIавасса оьруснал шагьрурду ва тIабиаьт ккаккан дуллали­сса сериягу, студент заманнайра ван

ал дурсса графикалул давурттугу, миннувух – Модардал къатлунсса лаххиялул эскизругу.

[dropcap]В[/dropcap]ыставка тIитIлатIисса махъ лахълай, Дагъусттаннал Культуралул центрданул Президент Арсен ХIусайновлул кIицI лавгуна художникнал суратирттал дунияллий Дагъусттангу, Ссивиргу, Москавгу, цайми регионнугу цачIун хьуну душиву, ванал оьрмулухсса ябитаву цумур-цагу миллатрал агьулданул культуралул ва гьарцагу кIанттул хIурматрайсса душиву, цува ХIусайнгу оьрмулуву мукуна инсаншиврий къуццу тIисса хIакьсса интеллигент, аьлимчу ивкIшиву.

[dropcap]В[/dropcap]ыставкалийн бавтIцири барча буллалисса ва художникнал гьунарданун лахъсса кьимат бишлащисса ихтилатру ялагу бувна Миллатир­ттал къатлул (ГБУ « МДН») директор С. Ануфриенкол, Гжель шагьрулул паччахIлугърал университетрал профессор Л. Абакумовлул, вава университетрал кафедралул хъунмур С. Ждановал. Этнограф-искусствовед, Аьрасатнал халкьуннал мастер ПатIимат ХIаммадовал бувсуна ХIусайнов ХIусайн Гжельскаллал паччахIлугърал университетраву дизайндалул кафедралий каялувшиву дуллай ивкIшиву чIярусса шиннардий ва чIявусса ххуйсса дизайнертал хIадур бувшиву, мукуна туризмалул ва сервисрал Аьрасатнал паччахIлугърал университетраву Модалул ва дизайндалул институтрал директорну, факультетрал деканну зий ивкIшиву, бархъаллал лаххиярттан ва чIюлушиннардан ванал творчествалуву биялсса бутIа буллуну бушиву, щалвагу Аьрасатнахьгу, дунияллухьгу Дагъусттанная, республикалул культуралия, тIабиаьтрал ххуйшиврия суратир­ттал мазрай буслай ушиву.

[dropcap]В[/dropcap]ыставка дуван бакIрайнласу бувминнахь ва бувкIцириннахь барчаллагь тIисса ихтилат бувна художникнал душнил Алина ХIусайновал. Ванил бувсуна буттал цIусса давуртту, хаснура автопортретру, уттигъанну бакIрайн дагьшиву, щалвагу кулпатран хъуннасса ххаришиву хьушиву цIусса суратру лякъаву. «ХIусайнов ХIусайннул суратирттава чIалай бур ва тIабиаьтрах, лагма-ялттусса караматсса кIанттурдах, ххуймуних эшкьи хьусса, ххуймур хIисав шайсса инсан ивкIшиву, ца ххуйну, магьирну ккаккан дурну дур ванал цала суратирттаву тIабиаьтрал ххуйшиву ва дунияллул гармония, чIалай бур ва цувагу цIанихсса художниктурал школарттая магьиршиву лархьхьусса ушиву, ванал жунна кьариртсса суратирттал дуниялгу жува хIайрангу, ххаригу буллалисса, бюххансса асарду жула дакIурдиву кьабитлатисса дур», – тIий бур Дагъусттан Культуралул центрданул вице-президент БатIи Оьмарова.