Апрель зурул 11-нний ДР-лул Халкьуннал Мажлисрал законналсса, паччахIлугърал строительствалулсса, кIанттул цила каялувшиврулсса ва регламентралсса буллалисса комитетрал председатель Артур Исрапиловлул ва ЦIуссалакрал райондалул бакIчинан кIанайсса Сулайман Рамазановлул ххал бивгьунни ЕДДС-рал (дежурный диспетчер къуллугърал) цIусса идара. ЦIусса диспетчер къуллугърал идара буссар ЦIуссалакрал шяраву Мирзоевлул цIанийсса кучалий. ХьхьичIва буссия лекьан нигьачIаву дусса дух хьусса къатраву.
Идаралул къатри ххал диргьуну махъ Артур Исрапиловлул барча бунни ЕДДС-рал коллектив ва кIул хьунни диспетчертурал къуллугърал даврищал. Хъамаллурахь вайннал бувсунни цивппа хьхьу-кьини дакъа ДР-лул МЧС-рал Ситуационный центрданущал дахIаву дуну зун бикIайшиву ва, иш багьний, агьалинаща кумаграл хIакъираву 112 номерданийхчIин оьвчин бюхъайшиву. КIицI лавгунни ЦIуминалийсса чIявуми инсантурал масъалартту электроэнергиялуцIун ва щин дакъашивруцIун бавхIусса бикIайшиву.
Хъамаллурал мукунна ххал диргьунни идаралул къатраву дурсса ремонт, зузалтран хIасул дурсса шартIру.
