Апрель зурул 10-нний ЦIуссалакрал райондалул муниципалитетрал активрал ва шяраваллал бакIчитурал ирглийсса совещаниялий ххал бивгьунни контрактрал къуллугърал ва интнил призыврал хIакъиравусса масъалартту. Совещаниялий гьурттушинна дунни ДР-лул Халкьуннал Мажлисрал Законналсса, паччахIлугърал строительствалулсса, кIанттул цила каялувшиврулсса ва регламентралсса буллалисса комитетрал председатель Артур Исрапиловлул.
Интнил призыврал кампаниялул даврия бувсунни ЦIуссалакрал райондалул бакIчинал бигарду биттур буллалисса Сулайман Рамазановлул, Хасавюрт шагьрулул, Хасавюртуллал ва ЦIуссалакрал районнал дянивсса аьралий комиссариатрал 2-мур отделданул хъунама Артур Аджиевлул. Интнил призыврал кампаниялул даврия ва контрактрай къуллугъ бан ччиминнан контракт чичавриясса бувчIин бавуртту дунни комиссариатрал хъунаманал.
Апрель зурул 1-нний дайдирхьуссар интнил призыврал кампания. Призывниктурал цIуллушиврул тагьар ххал дигьаву мурадрай хIасул бувну буссар районнал дянивсса медкомиссия. ЦIуссалакрал райондалул аьралий комиссариатрайн тапшур бувну буссар гьашину интту 36 жагьил аьралуннаву къуллугъ буллан тIайла уккансса.
Артур Исрапиловлул кIицI лавгунни аьралуннаву къуллугъ бан буцлацисса жагьилтал хасъсса операция нанисса кIанттурдайн ва Аьрасатнал цIусса регионнайн къагьанбантIишиву.
Му бакъассагу, Артур Исрапиловлул бувсунни агьалинащал дачин дан аьркиншиву призыврал кампаниялул даврицIунсса бувчIин бавуртту.
КIицI лавгунни призыврая махъаллил хьусса жагьилтал административ ва уголов жаваблувшивурттайн кIункIу бантIишиву.
