Апрель зурул 3-нний МахIачкъалалив Дагъусттаннал кIулшивурттал даража хьхьичIунмай баврил институтраву хьунни «Первоцвет – 2023» тIисса мюрщими классирттал дуклаки оьрчIал ахттаршиннардал конкурсрал финал.

[dropcap]Ш[/dropcap]икку гьуртту хьунни конкурсрал муниципал бутIуву ххув хьуну бивкIсса гьунар бусса оьрчIру. Дуклаки оьрчIал творчествалул проектру дия буттал улклул тIабиаьт, аьдат-эбадатру лахьхьаву ва дуруччаву мурадрайсса. Конкурсрай гьуртту хьусса оьрчIал цинявнналагу проектру дия хIакьинусса яла цIурювкьуми масъалартту ахттар буллалисса.
МахIачкъалаллал 16-мур шко­­лалул 4-мур классрал дуклаки душ ПатIима Кьура­махIам­мадовал «Природа – источник творчества» тIимур номинациялий бувгьунни 1-мур кIану.
ЧIава ахттарчитурал конкурсраву 1-мур кIану бувгьусса душ бур ГъазимахIаммадов Абакардул душнил душ.

ПатIиман, чIивинияцIава Бархъарав бава-ттаттахъачIан букIлай, лавхьхьуну бур синааьрщарая тIахIунтту дуллан. ЧIавасса оьр­мулий ва цимилгу гьуртту хьуну бур тIахIунтту дувултрал выставкарттай, фестивальлай. ХIакьину вайннал кулпатраву цимигу никирая шихуннай ядуллалисса сянат щяв дагьан къариртун, мюрщисса, магьирсса каруннал дачин дурну дур. ХъатIайн-байраннайн лаххайсса нукIузаманнул бузмагу ларххун, ккаккан бунни ПатIимал тIахIунтту даврил мастер-класс. Му бакъассагу, ванил цила проектраву гьарта-гьарзану бувсунни Бархъаллал аьдатирттая, зунттал халкьуннал багьу-бизулия.
Конкурсрайн ПатIима хIадур буллай, хъунмасса захIмат бивхьуну бия МахIачкъалаллал 16-мур школалул учительница Фаина ХIажижамаловнал.