АхIмад-Хан Султаннал увкуссар: «МукIру хьун ччай ура ттунма къабавшиву ле­ххан хIадур хъана­хъисса космонавтътураву да­гъусттанчу уссар тIисса хавар. Амма на хъинну вихну ура жулла республикалул арс чара бакъа леххантIишиврийн космосравун, ттула пикрилий, мугу икIантIиссар лаккучу», – куну.

Гьарца шинал кунна, гьашинугу щалагу Аьрасатнаву апрельданул 12-нний кIицI ларгунни Космонавтикалул кьини. Дунияллул тарихраву цалчин космосравун инсан левхсса кьини жулла республикалул районнай ва шагьрурдайгу шай личIи-личIисса шадлугъру.

[dropcap]М[/dropcap]ахIачкъалалив, мисалдаран, «Аьрасат – ттул тарих» тIисса тарихийсса паркрал ва кьинилун хасну хIадур дурну дия хъуннасса программа. Ванил лагрулий шикку хьунни мастер-классру, викторинарду, оьрчIал дирхьусса суратирттал фестиваль, ккаккан дунни кино.
Аьрасатнал Халкьуннал аслисса культуралул центрданул филиалданий тIурча, хьунни оьрчIал цалла карунних дурсса затирттал «Космические фантазии» тIисса цIанилусса конкурс.
1961 шинал апрельданул 12-нний космосравун левхсса Юрий Гагариннул кIий дурссар 108 минут, ва усса «Восток» корабль-спутник, аьрщарал лагмагу бувккун, ккаккан бувсса кIанай щябивкIссар.

Жула лаккучу Муса Маннаров хъанай ур Дагъусттаннаясса цалчинсса ва увагу усса ца космонавт. Ва цалчина-цалчин левхссар 1987-ку шинал декабрьданул 21-нний «Союз ТМ-4» корабльданий ва «Мир» орбитальный комплексрай. Экипажрал командир Владимир Титовлул ва бортинженер Муса Маннаровлул орбиталий дурссар шин, ва хьу­ссар дунияллул рекорд. Ва чIумул му­тталий Муса Маннаров шамийла увкссар тIивтIусса космосравун. Вания махъгу Муса левхссар космосравун. 1990-ку шинал декабрьданул 2-нний левххун, 1991-ку шинал майрал 26-ннийнин бивкIссар аьламраву Муса Маннаров, Виктор Афанасьев ва Тоехиро Акияма.