Райондалул бакIчинал кьамул бунни агьали

Апрель зурул 4-нний ва 5-нний ЦIуссалакрал райондалул хъунаманан кIанайсса Сулайман Рамазановлул кьамул бунни райондалул агьали. Цала масъаларттая ва буруккинттая бусан ши­ккун увкIун ия 20 инсан. Миннава 8 инсан ия Новостройрая увкIсса. ЧIявуминнал буруккин бия ялапаршиннарал шартIру къулай даву, бия аьрщи дулара учин бувкIссагу. Сулайман Рамазановлул, агьалинал масъаларттахгу вичIи дирхьуну, ми щаллу баврил хIакъиравусса бувчIинбавуртту дунни. Бувсунни райондалул хъуниминнаща щаллу бан къашайсса масъаларттал ялув чун гьантIиссарив. Шайнан бунни аьркинсса кумаг.
ДакIнийн бутан, райондалул хъуниминнал кьамул байссар агьали гьарца нюжмардий. Приемрайн чичин шайссар ва телефондалийн оьвкуну: 8(87)242 21 500.

ТанмихI кьувкьунни

ЦIуссалакрал райондалул судрал танмихI кьувкьунни АьФ-лул Уголов кодексрал 234-мур статьялул 1-мур ва 3-мур бутIрайн дагьайсса тахсиркаршиву дурсса райондалиясса цаннан. Ванай, закондалул ххуттава увккун, хъинну асар шайсса ва загьрулул айсса затру ишакаш даврий тахсир ккав­ккунни. Ванан 3 шин ва 3 зуруй дуснакь ансса танмихI бунни.
Судрал мяйжан бунни ванал 2022 шинал декабрьданул 23-ннийн бияннинсса чIумуву закондалуцIун къаавкьуну ца инсанначIату машан ларсшиву чIярусса, хъинну асар шайсса «Лирика» тIисса затру ва дарххушиву ми цаманан 6000 къурушран.
Ваналва 2022 шинал октябрь зурул 23-нний закондалуцIун къаавкьуну машан ларсун дур мукунна хъинну асар шайсса «Тропикамид» тIисса затру. Мигу дарххуну дур 9000 къурушран.

«Зул чагъардал жул дакIру рахIат дай»

ЦIуссалакрал райондалийсса Гьамиящиял шяравасса МахIаммад Оьмаров хасъсса аьралий операция байбивхьуну цалчинсса гьантрая шихунай хьхьирил бахьттагьалтрал кьюкьлуву дуручлай ур жула дазурду. Шяраваллил жяматран МахIаммад кIулли яхI бусса, хъинсса, захIматсса тагьарданийсса инсаннан кумаг бан хIадурсса жагьил хIисаврай.
Аьралуннавугу ва мудангу хIадурну икIай цала дустуран кумаг бан. 2022 шинал апрель зуруй, МахIаммад усса батальон артиллериялул цIарахьхьун дирирну, ванан чIярусса цIунцIияртту хьуну дур. Хъин шайхту, ва зана хьуну ур аьралий операция нанисса кIанттурдайн.
Аьраличу барчаллагь тIий ур, цайра дакI цIий, посылкартту ва аьчухсса чагъарду гьан буллалисса дуклаки оьрчIахь.
– Ва захIматсса чIумал зул дакIнийхтунусса чагъардал жу рахIат бару, ххув хьунсса вихшала ххишала дувай, – тIий ур аьраличу.

ХьхьичIунсса кIану бувгьунни

Апрель зурул 1-нний Ма­хIачкъалалив хьунни спортрал школарттал клубирттал дянивсса ттуплий буккаврил Республикалул первенство. ЦIуссалакрал райондалия шикку гьуртту хьунни тренер Аьлимирза Ибрагьимовлул каялувшиврийсса ЦIуссачIурттащиял отделениялул ДЮСШ №1 команда. Первенствалий гьуртту хьусса 14 командалува ЦIуссалакрал райондалул оьрчIал командалул бувгьунни шамилчинсса кIану. ОьрчIал ккаккан бунни цала гьунар ва спортсментурал хасият, цаярва опыт ххисса командарттащал бувккун.

Террорданийн къарщисса комиссиялул хIасиллу

ЦIуссалакрал райондалий, райондалул Террорданийн къарщисса комиссиялул хъунаманал ва райондалул бакIчинан кIанайсса Сулайман Рамазановлул каялувшиннаралу хьунни Террорданийн къарщисса комиссиялул заседание. Ванил лагрулий хIасиллу дунни 2022 шинал лажиндарай райондалул Террорданийн къарщисса комиссиялул дурсса даврил ва ххал диргьунни 2023 шинал дулланмур. ЦIакь дунни райондалий Терроризмалул идеологиялийн къарщи бацIаву мурадрай дуллантIисса давурттал план.
Шикку ихтилатру бунни Террорданийн къарщисса коми­ссиялул давриха зузисса отделданул хъунмур ПатIимат Шагьмиловал, Культуралул управлениялул хъунаманал хъиривчу Заур МахIаммадовлул, КIулшивуртту дулаврил управлениялул хъунмур Светлана Кудаевал.
Заседаниялийн оьвкуну бия ихтиярду дуруччай структурардал вакилтурайнгу.
АТК-лул члентурал, ххал бигьаву мурадрай, шикку мукунма гьаз бунни кIулшивуртту дулаврил, культуралул объектру террорданул иширттая мюхчан бан­сса чаран лякъаврил ва му чулуха ялун лирчусса диялдакъашивуртту дукьан даврил масъалартту.
Цинявппагу гьаз хьусса масъаларттал хIакъираву бунни хIукмурду. Ми щаллу баврил ялув ацIаву дан тапшур бунни жяматрал мюхчаншиврулсса буллалисса райондалул хъунаманал хъиривчу, АТК- лул секретарь Макьсуд ХIаммидовлуйн.

Экологиялул ххуллийсса мурадру

Щалагу Аьрасатнаву нанисса «Волонтеры могут все» тIисса экологиялул проектирдал конкурсрал региондалийсса ятIапрай «Буттал кIанттул вирттал» тIисса номинациялий 2-мур кIану бувгьунни ЦIуссалакрал райондалиясса дуклаки душнил. Республикалул конкурс най ду­ссия январь зурул 18-нния мартрал 31-ннийн дияннин. Ванил мурад бия кIулшивуртту дулаврил идарарттай экологиялуцIун дархIусса волонтертурал ва ахттарчитурал суккушинна щурущи даву, мюрщиминнал ва жагьилтурал агьамсса экологиялул проектру дансса сиптардал чIарав бацIаву. Конкурсрал дия личIи-личIисса номинациярду: «Скажем нет урону природе», «Цветущая планета», «Волонтеры спешат на помощь», «Герои Отечества», «Мусор угроза или вторая жизнь», «Пойдем экологическими тропами», «Друзья наши меньшие», «Мир своими руками».
Региондалул конкурсрал сакиншиндарал комитетрайн дуркIун дур ххюва шагьрулиясса ва ацIния кIира райондалиясса 49 даву. Жюрилул язи дургьусса давурттаву дур ТIюхчардал школалул 8-мур классрал дуклаки душ СайгидахIмадова Руфайдал давугу. «Герои Отечества» номинациялуву ванин буллуну бур кIилчинсса кIану. Руфайдал каялувчи бур ХIажиева Малика МахIаммадовна.

Ниттил мазрал пасихIшиву

ЦIуссалакрал райондалиясса дуклаки оьрчIал хьхьичIунсса кIанттурду бувгьунни «Дагъусттаннал автортурал произведенияртту ниттил мазрай яла ххуйну бувккума» тIисса гьарица шинах дайсса республикалул конкурсрай. Шикку гьуртту хьунни республикалул школардал 11-ми классирттал дуклаки оьрчIру. Конкурсрал мурад бия творчествалул гьунар бусса оьрчIру ялун личин баву, миннавун мукъул искусствалухсса гъира бутаву, дакIнихсса ва чичрулул мазрал культура гьаз даву, художествалул литература буккаврихух гьан баву.
Конкурс хьунни 10 мазрай. Аьмну шикку гьуртту хьунни 46 шагьрурдаяссаясса ва районнаясса 100-нния ливчусса оьрчIру.
«Лакрал литература» тIисса номинациялуву кIилчинсса кIану бувгьунни ЦIуссаккуллал цалчинмур школалул дуклаки душ Аминат Жалаловал.

ЦIуссалакгу хIала хьунни акциялувух

ЦIуссалакрал райондалийгу дайдирхьунни Щалагу Аьрасатнаву нанисса «Дети России – 2023» тIисса профилактикалул акция. Акция най дикIантIиссар апрель зурул 3-нния 12-ннийн бияннин.
Акциялул сакиншинначитал хьунни Аьрасатнал Виваллил иширттал, ЦIуллу-сагъшиву дуруччавил, КIулшивуртту дулаврил министерствартту ва Росмолодежь.
Ванил мурад бур балугъравун къабивминнал ва жагьилтурал дянив наркомания ппив хьун къаритаву. Агьалинаща бюхъантIиссар цIа кIицI къадурну цанма кIулсса, наркотикру ппив буллалисса, ишла буллалисса ва ябуллалисса иширттая ЦIуссалакрал райондалул ОМВД-лул дежурная частьрайн баян бан ва номерданийн оьвкуну:
8 877 422 14 03.