Терроризмалуща бурувччуну бикIан

Ккуллал райондалий хьунни Террорданийн къарщисса коми­ссиялул пландалийнусса заседание. Ванил каялувчину ия Ккуллал райондалул администрациялул бакIчи, АТК МО-лул председатель Шамил Рамазанов.

Шикку гьурттушиву дунни шяраваллал администрациярттал бакIчитурал, комиссиялул члентурал, хIасиллу дунни утти­нин дурсса даврил.
– Жунма кIулсса куццуй, Украиннал аьрщарай най бур хасъсса аьралий операция. Жу жула Президентнал хIук­мулуцIун бакьлакьиссару ва мудангу чIарав буссару. Аьра­сатнал виваллил иширттал ва кIанттул цила каялувшиннарал къуллугърал зузалт хIарачат буллай бур инсантал террорданул щатIащагу, нигьачIаву дусса цайми-цаймигу иширттаща буруччин. Ялттура паракьатшиву дуну чIаларчагу, тагьар нигьачIисса дур, мунияту аьркинну бур кIантту-кIанттурдай мюхчаншиву ххишала дан, – увкунни администрациялул бакIчинал.
Шикку мукунма ххал бивгьунни райондалийсса гьарцагу идаралий, чIявусса инсантал батIайсса кIанттурдай мюхчаншиву цIакь даврийн багьайсса масъалартту. Ва масъалалуцIун бавхIусса докладру бувна райондалул администрациялул бакIчинал хъиривчу Анатолий Давдиевлул, райондалул УО-лул хъунаманал буржру биттур буллалисса Ж.Оьмариевлул, МКУ-лул директор М.Ибрагьимовал, АТК МО аппаратрал ведущий специалист М. Рамазановлул ва м.ц.

Шамил Рамазановлул тIалав бунни гьарцагу зузалая, ва ма­­съалалул хIакъираву ялув бацIаву дуну, личIлулну бикIаву, барчаллагь увкунни террорданийн къарщисса давурттаха зузисса комиссиялул гьурттучитурахь, кIицI бунни хIакьинусса кьини мюхчаншиву дуруччаврияр агьамсса масъала цамур бакъашиву.
Ахирданий АТК-лул комиссиялул личIи бунни экстремизм ва терроризм ппив хьун къаритансса давурттал ялув бацIаву дуллансса хасъсса инсантал.