Барча цалчинсса цалчинмур кIану

Дагъусттаннал кIумур атлетикалул чемпионатрай (ва СКФО-лий хьунтIисса чемпионатрайн хьхьичIунми личIи буван­сса чемпионатри цурдагу) Гъумучатусса Бахттун СалихIовал цалчинмур кIану бувгьунни, 120 килограмм кIушиврул дусса штанга гьаз дурну.

ОьрчIнийва спорт ххирасса Бахттун школалий ва университетраву дуклакинийгу спортрая архну къабивкIун бур, фитнесрайн, гимнастикалийн, гьузун занай бивкIун бур. ДукIу тIурчарив, ванин кIушивуртту гьаз дуллалисса спортрахун багьан гъира багьну бур. Олимпий чемпионка Елена Исинбаевал цIанийсса «Труд» стадиондалийн занан бивкIун бур кIусса атлетикалул спортрал мастер, тренер ХIусайхан Закарьяевлуч1ан.

Ванил бусаврийн бувну, цIубутIуй, вардиш бакъа, захIматну бивкIун бур, гьарца кьинисса тренировкарттал сантирайн бувтун бур, хIатта хIасиллу гацIана ххари буван­сса хьуну дур. 2022 шинал август зуруй тренировкарттайн занан бивкIсса Бахттуннул декабрь зуруй Бабаюртлив республикалул турнирданий кIилчинмур кIану бувгьуну бур. «Ттувун цалчинмур кIану бугьан аьркин­ссар тIисса зуву дагьуна, тренернайнгу барчаллагьрай бура, ттувунма гъира бутлай, дакI дуллай ивкIун тIий», – тIий бур ва. Жугу дакIнийхтуну барча дуллай буру Бахттуннул лахъазан – цалчинсса цалчинмур кIану, чIа тIий буру цIу-цIусса ххувшавуртту. Гьай-гьай, кIусса затру гьаз дуллали­сса спорт хъаннил кIану бакъасса кунма чIалан бикIай, ялув тту­ккун, диялсса аьй-бювкьурду дуванмигу бувккунни Бахттуннуй, диндалул хIурмат бакъашивур, къабучIиссар, къалайкьссар тIисса варсагъру хьхьичIун бугьлай. Бахттунмур цилва ххуллийн бувккун бур, ххуллу наниналли битайсса.

Жугу икьрал дуварду Бахттуннущал хъиривсса цания-ца номерданий бусан цуппа ва ххуллийн циван бувкссарив, хъаннил кIану бакъар тIутIаврил хIакъираву ванилмур пикри-зикри цукунсса бурив. ЦIу-цIусса ххувшавуртту ва тIайлабацIу чIа тIий буру!