Ккуллал райондалул имам МухIаммад-Маннар Бариевлул Аьрасатнал джиу-джитсулул чемпионатрай шамилчинмур кIану бувгьуну бур. Вара чемпионатрай грэпплингралмур журалий ванал мусил медаль ларсун дур.

– Аьрасатнал чемпионатрая муси къаларсун гьан ччай бакъая ттун. Ин ша Аллагь, Дунияллул чемпионатрайн хIадур хъанантIиссара уттива, – укун чичлай ур МухIаммад-Маннар Инстаграмрайсса лажиндарай.

Ва, исламрал кIулшивуртту куртIгу, цIакьгу дуллалисса ушив­руцIун (ларгсса шинал ванал, Да­гъусттаннал гуманитар институтрал магистратура къуртал бувну, диплом лавсъссия), спортрахунгу машхулсса, уттинингу спортрал дунияллий хьхьичIунсса кIанттурду бувгьусса жагьил ур. МухIаммад-Маннар Бариев барча унни цала Телеграм-каналданий Ккуллал райондалул хъунама Шамил Рамазановлулгу. Ванал кIицI лавгунни МухIаммад-Маннар Аьрасатнал сийлийсса чемпионатрая кIийла ххувшаврищал зана хьушиву.
Жугу чIа тIий буру ванан цIу-цIусса ххувшавуртту спортраву, оьр­мулуву хьхьичIуннайшивуртту!