[dropcap]М[/dropcap]артрал 22-нний Аьшттархан шагьрулий хьусса КВН-лул «Астрахань. Школьная» тIисса оьрчIал лигалул полуфиналданул тIуркIулий жулла республикалиясса «Дети FREE» тIисса цIанилусса команда лайкь хьунни Гран-приран. Аьшттархан шагьрулул мэрнал Кубок лавсун, жулла команда дурккунни финалданийн. Ва тIуркIулий гьуртту хьуссар 18 команда, хъунмурчIин Аьшттарханнал областьраясса.
«Дети FREE» командалул каялувчи, Дагъусттан Республикалул ОьрчIал КВН-лул школалул директор, КВН-лул Ухссавнил Ккавкказуллал юниор лигалул директор, Кьукуннал шяравасса Мурад Макьсудовлущалсса хъун бакъасса ихтилатгу хьунни КВН-лийн багьайсса.
Мурадлул буслай, «Астрахань. Школьная» бур дахьра сакин хьусса, опыт бакъасса командартту гьуртту шайсса лига. «Дети Фри» команда сакин дурну бувагу барз ва бачIи хьуну бур. Ва командалул оьрчIру ваниннин цалвагу бувккун бакъар сахIналийн. Аьшттархан шагьрулийнсса аьрххигу, сахIналийн буккавугу хъанай дур вайннал цалчинна-цалчинсса.
– Ва командалийн бивхьусса жул умудру, 100 процентрал цир, 200-гу процентрал щаллу хьунни. ОьрчIру хъинну гъирарай бия сахIналийн буккан, вайннал оьтту-ттурчIавурасса харизмалул цилла даву дурунни. Хъунмасса асар биян бунни оьрчIал ххув хьунсса гъирарал, хъит-шитлил. Дахьра сакин хьусса командалуща, оьрчIал кьянкьасса дакIурдийн бувну (оьрусрай учайсса куццуй, «дух победителя»), вайннал нитти-буттал, учительтурал ва жул хIарачатрайн бувну ххув хьун бювхъунни. Ттул ттулла дакI та-духьурчагу паракьат дакъа дикIай команда сахIналий дусса чIумал. Хаснува звукорежиссер хIисаврай щяивкIун цимурцаннух уруглагисса чIумал щуруй бикIай буслай бусан къашайсса, оьрмулухун дакIний личIансса, ялагу-ялагу тикрал хьуну ччисса асарду. Ва ххуллухьмур тIуркIурив ттун ттунма хъинну захIматсса бия, вай асардугу къаччива ттун цал ттигу бухIан. ЦIунила цIунил ва тIуркIулух уруглан ивкIукун, цал ххишалану бувчIлай бур – ва, цалчин бакъа, кьуния цалчин сахIналийн бувкссаннангума ххаллилсса тIуркIу бушиву, жула, Дагъусттаннал, оьрчIру яла ххуйми бушиву.
Вай оьрчIан школалийгу, шардагу, КВН-лувугу, аьрххирдайгу, сахIналийгу низам цалчинсса кIанттайри дусса. Тренертурал, преподавательтурал учайсса куццуй, агарда низам цалчинмур кIанай духьурча, махъсса цимурца дуссар чIамуй цила-цила кIанай, цилла ссятрах ялугьлай. Укун, гьарцагу жул командалул ххувшаву (ва хъанай дур жул командарттал шамилчинсса ххувшаву) хъар хъанахъиссар хьхьичIра-хьхьичI низамрая, дисциплиналия. Ттун хъунмасса пахру бур вай оьрчIая. Гихунмайгу вава куццуй, тийнмай-шийнмай къавхьуну, бачирча, вай хъуни-хъунисса бюхттулшивурттайн биянтIиссар, щак бакъа, – тIий ур Мурад.
Ва командалийн бивхьусса жул умудру, 100 процентрал цир, 200-гу процентрал щаллу хьунни. ОьрчIру хъинну гъирарай бия сахIналийн буккан, вайннал оьтту-ттурчIавурасса харизмалул цилла даву дурунни. Хъунмасса асар биян бунни оьрчIал ххув хьунсса гъирарал.
«Дети Фри» командалуву бур лакку оьрчIругу: Карашатусса Назирхан ХIажиев ва ЧIятусса Мурад МахIмудов.
Шиккува Мурадлуя цаявагу ца-кIива хха. Мурад увну ур МахIачкъалалив 1988-ку шинал, Кьукуннал шяравасса Макьсудлул ва ЦIущуллал шяравасса, аьпа биву, Нурбаял кулпатраву. Шагьрулул 5-мур лицейгу къуртал бувну, увххун ур Политехнический университетравун. Ва къуртал бувну, личIи-личIисса кIанттурдай зий ивкIун ур. Чув зурчангу, Мурадлул цалла агьаммур даврицIун къакьабивтун бур цанма ххирасса, цува 11-мур классрава айивхьуну агьсса КВН. Мурад хъярч-махсарардахун агьну сайки 20 шин хъанай дур.
ОьрчIалмур КВН-лувун цукун агьра тIисса ттул суалданун Мурад укун тIий ур:
– ОьрчIалмур КВН-лувун цукун агьра тIутIаву къатIайлахьунссар, учин аьркинни цукун увкIра оьрчIалмур КВН-лувун куну. Цалчин, на навагу ппу ура, кIилчин – ттун хъинну ххирар оьрчIру, личIи-личIисса къуллугъирттай чIярусса шиннардий зийгу ивкIра ва ура оьрчIащал. Ва ялагу, ттул хьхьичIунсса дус Аьли Аьлиев (жу архIал Дагъусттаннал КВН-лул ЦачIун дур командалувугу буклай бикIайссияв) ур КВН-лул «Не по-детски», «Дети гор» командарттал директор. Аьли цувагу хъинну гужсса редакторгур, авторгур. Аьли Москавлив зий ва ялапар хъанай ур. ЦIанасса чIумал ва ур КВН-лул щалагу Аьрасатнал юниор лигалул ва КВН-лул Москавуллал юниор лигалул, мукуна цайми-цаймигу лигардал редакторну. КВН-луву хъинну хъунмасса опыт бусса Аьлил жун мудангу кумаг бувай, чIарав ацIай. Ванияр 7 шинал хьхьичI айивхьуна Аьли Дагъусттаннай оьрчIал КВН-луха зий, ца шинавун ванащал нагу. «Не по-детски» тIисса команда сакин дурну, личIи-личIисса кIанттурдайх занан бивкIру. Ва команда 2020-ку шинал ххув хьуссар СТС каналданийсса «Шоу талантов» оьрчIал КВН-лий. Хъирив сакин дуварду «Дети гор» цIанилусса команда. Ва гъинттул «Дети гор» команда гьуртту хьунтIиссар «Шоу талантов» оьрчIал КВН-лий. Укун, ттула дуснайн бувну, увкIссара на оьрчIалмур КВН-лувун.
«Дети FREE» – ва цIа оьрусрай «Тархъансса оьрчIру» тIисса цIа хъанай дур. Мурадлул увкусса куццуй, цавунма цивппа кьутIаврия, цавунма цивппа лагаврия тархъансса оьрчIру, тархъанну пикри буллалисса, шиная шинайн хъуни хъанахъисса бакъача, ссятрая ссятрайн хъуни хъанахъисса.
ЧIа тIий буру тархъансса оьрчIан мудангу тархъанну лехлан, тархъанну оьрму бутлан.
