Дунияллул халкьуннал театрданул кьини МахIачкъалалив хьунни аьдатравун дагьсса театральный «капустник». Муний гьуртту хьунни республикалул цинявппагу 12 театр, миннувух 8 миллатиртталссагу.

«Капустник» дайдишин хьхьичI Дагъусттаннал культуралул министр Зарема Буттаевал барча дунни республикалул театрал ишккаккултрахь пишакаршиврул байран.
– Театрдануву зузисса цинявннал – актертурал, режи­ссертурал, чанналсса, чIунилсса байсса пишакартурал, театрал художниктурал, гримертурал, сахIналул зузалтрал ва критиктурал даврин кьиматгу бишлай, хIакьину жу барчаллагь тIий буру зухь.

ДакIнийн бичлай буру жуятува лавгсса театрал ишккаккулт. Гайннал цIардацIун ва творчествалуцIун дархIуну дуссар республикалул тарихрал пахру бан лайкьсса дагъусттаннал магьирлугърал хьхьичIуннайшивуртту. Жула билаятрал цIа ларгун ду­ссар чIявусса театрду бушиврул, хьхьичIунсса театралтурал дакIру хIайран дурсса ххаллилсса режиссертурал, актертурал постановкарттал.

Пишакарсса миллатрал театрдал ва халкьуннал театрдал аьдад, жулла республикалий дуллалисса регионнал ва дунияллул халкьуннал дянивсса фестиваллал, форумирттал даража, яргсса премьерар­тту, гастроллу хIисав бувну, Да­гъусттан ккалли бан бучIир Театрданул территориялун. Цала гьунардайну жува ххари буллай буру хъуними ва оьрчIру гьурттусса халкьуннал коллективрдал, цайнува цивппа хьусса творческий ккураннал.

Барчаллагьрай бура респуб­ликалул театрал организациярттал зузалтрайн, инсаниятрал бюхттулсса идеаллай тамашачи тарбия уллалисса, тамашачитураву магьирлугърах­сса ччаву тарбия дуллалисса захIматрахлу. ЧIа тIий бура зун цIакьсса цIуллушиву, бухкъалагайсса гьавас ва цIу-цIусса яргсса постановкарду, дакIру тIайласса зул тамашачитуран тIурча, чIа тIий бура абадлийсса театрал магьирлугъращал хьунабакьавриясса хъамакъабитайсса асарду, – увкунни министрнал.

Барча баврия махъ тамашачитуран ккаккан дурунни «капустник». Шикку театрдал идарарттал зузалт хьунабавкьунни кувннащал кув, барча бунни кувннал кув хъярчийсса номердайну.
Оьруснал театр оьвтIий бия Театрал Заннайн, агьамми роллу цалархIал цинявппа актертурайх дачIи тIий. Къумукьнал театрданул актертурал ккаккан бунни каялувчитурайнсса ва даврил уртакьтурайнсса породия. Лакрал театрданул тIурча, маслихIат бунни цала цIа да­ххана дан, Шекспировский театр дизан. Мяйжаннугу, Лакрал театрданул ва цIа хIалал дурну дунуккар – репертуардануву шанма-шанма ххаллилсса спектакль Шекспирдул произведениярттая бивхьусса!