Рисала дуккаврий гьуртту хьунни Федерал Собраниялул вакилтал, властьрал республикалул ва муниципал органнал каялувчитал, федерал идарарттал, предприятиярттал бакIчитал, дуккаврил ва элмулул, культуралул ва спортрал ишккаккулт, хъунисри ва жагьилтал.
[dropcap]С[/dropcap]айки азараксса дагъусттанлув лайкь хьунни хасъсса операциялий гьуртту шаврихлусса орденнан ва медаллан, миннал иширайну тасттикь бунни лайкьну бушиву ттаттахъал аьпалун ва цIардан. Муния бувсунни цала Рисалалуву Сергей Меликовлул.
«Махъсса шинал мутталий билаятран багьну бур ярагъгу кIунттихьну буручлан жула билаят ва жула бияла (суверенитет). Ми дунияллул лагрулийсса иширттаву щалла дунияллийх перхха тIутIи бунни жула игитътурал яхI-намус», – кунни Республикалул БакIчинал.
Сергей Меликовлул дурккунни СВО-лул лагрулий Аьрасатнал Вирттаврал цIарду ларсминнал сияхI:
НурмахIаммад ХIажимахIаммадов,
Асадуллагь Абачев,
Энвер Набиев,
Руслан Кьурбанов,
Исрапил МахIаммадов,
Михаил Абрамченко,
Шамил МахIаммадов.
«Цуксса хIайпнугу, кувний гьунарданул кьиматну бацIайссар щала оьрму. Жура дуллай буру жулла Ватандалухлу жанну кьурван дурминнал хажалат», – кунни Сергей Меликовлул.
«Фронтран кумагран республикалул СВО-лул зоналийн тIайла дуркссар 5 азаллий 180 тонна гуманитар кумаграл, диннал ккураннал ва ихIсандалул фондирдал чулухамигу хIисавну – 8,5 азарда тонна. Му регионнавату ца яла хъунмур ккаккияр», – кунни республикалул каялувчинал.
«ЗахIматшивурттахгу къабурувгун, Дагъусттаннал дуллай бур хьхьичIунсса ккаккияртту социал-экономикалул лябуккулуву», – кунни ванал.
Республикалул инвестициярттал программалул лагрулий ларгмур шинал хIасиллайну бувну бур 110 объект: 14 школа, 54 оьрчIал багъ, 11 спортрал объект, 17 – газралсса, 10 – щинал дузал баврилсса.
Республикалул БакIчинал тIимунийну, тамансса лябукку хьуну бур куклумур промышленностьраву, шяраваллил хозяйствалуву ва строительствалуву.
Сергей Меликовлул шанма бутIуйх бавчIунни реал сектордануву цалчин дузал буван аьркинсса захIматми масъалартту:
Идарарттал фондру цIубуккан баву, ми давуртту дуван аьркинссар промышленностьравугу, шяраваллил хозяйствалувугу ва цаймигу арардаву.
Республикалий Аьрасатнал экономикалул хъунисса компаниярттащалсса кооперацияртту уттава буккан баву.
Аьрщарал масъаларттавусса бакъакьавуртту духлаган даву.
Сергей Меликов: «Дагъусттанлувтурал иширайну тасттикь бунни ттаттахъал цIардан ва аьпалун лайкьну бушиву».
2022 шинал чIиримур ва дянивмур бизнесрая налогру дучIан даву гьарза хьуну дур 1,3-лла. Дагъусттаннал БакIчинал ляличIисса къулагъас дунни бюджетрал системалувун налогру гьарзану дучIан дуллалаврих.
[dropcap]В[/dropcap]анал тапшур бунни контрольданул, надзорданул ва ихтиярду дуруччай органнал давуртту хъин чулиннай даххана дуван.
Дух дурксса къатрава бизан буллалисса иширттаву аьркинссар инсантурал ихтиярду лиян къадуллан, – кунни Сергей Меликовлул цала Рисалалуву. Ванал дакIнийн бувтунни Каспийскалий инсантал общежитиялува бизан буллалисса чIумал ми гьарца кьини нигьачIавриву бивкIшиву.
«Инсантал кугьна хьусса къатрава бизан баврил программалул лагрулий 2023 шинал ахирданийннин цIусса минардайн бизан бувантIий бур сайки 1000 инсан ягу 300-лийсса кулпатру», – кунни региондалул бакIчинал.
[dropcap]С[/dropcap]айки 500 млн къурушру итадакьинтIий бургьашину чIиримур ва дянивмур ишбажаранчишиврун кумагран – Сергей Меликов
ЧIиримур ва дянивмур ишбажаранчишивруву зий ур 315 азара инсан. Шикку дувайссар шанма бутIул ца ВРП-лул.Гьарза хъанай бур цалва цивппа давурттал дузал буллалимигу(самозанятые) – хIакьину ми хIисавну ур 220 азара инсан.
Дагъусттаннал БакIчинал бувсунни информациялул давурттал агьамшивриягу.
Сергей Меликов: «Ларгсса шинал валовый регионал продукт лахъ хьуссар 3%, му махъсса шиннардий хьусса рекордрал ккаккияр».
Сергей Меликовлул бувсунни аьркинну душиву лавайсса даражалийн диян дуван паччахIлугърал аппаратрал ва властьрал органнал давуртту.
Региондалул каялувчинал бусаврийну, гьашину къулагъас дувантIий бур муниципал къуллугъчитуран харжру ххи баврих. Мунийну бюхъантIий бур муниципал сакиншиннардийн давурттайн буцин лавайсса даражалул пишакартал.
Рисалалул хIакъиравусса гьарза-гьартасса бусаву дикIантIиссар хъиривмур номерданий.
