Циминнанвагу ккавкссар тIар Щайх-Жамалуттиннул симандалия бивзун нанисса, бухIангума захIмат хъанахъисса чани, нур.

«Га шяравусса щала жямат, хъами-оьрчIру бувккуна ганал хьунин. Гьарма, гъан хъанай, ппай тIий ия ганал лаххиялул ссимиялттуйн. Ганал канийн ппай куна цала Шамиллулгу».

Щайх-Жамалуттин увну ур Гъази-Гъумук. Мунал нясаврал къяртта нани­сса дур МухIаммад-Идавсил(с.аь.с.) душнил ПатIиматлул арсну хъанахъисса мукьилчинма халипа Аьли-ХIусайннуяту. Мунийн бувну миннал тухумрацIун цIакь хьуну диркIссар «саэдтал» тIисса цIагу (титул). «Саэд» тIисса аьраб му­къул мяъ­нагу «паччахI», «заллу» тIисса мяънар. Бусласаврийн бувну, ХIусайнхъал ляхъин Да­гъусттаннайн бучIавугу тIайла дацIлай дур VII ттуршукулийн – Абу-Муслим халипасса заманнайн.
ЧIавасса чIумала Жамалуттин къуллугърай ивкIун ур Гъази-Гъумучиял ва Кураллал хан Аслан-ханнал секретарьну ва чагъарду чичуну. Ххуйсса даражалий буллалисса къуллугърахлу ханнал мунан бутIурай дуллуну дур Кураллал ханлугърайсса шанна шяравалу.
Амма, лахъи къалавгун, ханнал ичIаллил ххаллилшивуртту ва ххуй-чIюлушивуртту цала дакIнил къаласласисса чIалан диркIукун, «дуниявийсса къуллугърал бунагьлувшиву» ва зулмурдал залунначIасса зузаву цирив цанма бувчIлан бивкIукун, кьадиртун ханнал хIаятгу, Жамалуттин лавгун ур Дагъусттаннал тарикьатрал щайх Ярагъуллал МахIаммад-апанниначIан. Лавгун, кьамул дурну дур танаща тарикьат ва ларсун дур ихтияргу зунттал халкьуннал дянив му ппив дуллансса.
Жагьилсса оьрмулий му ивну ур Ккавкказуллал чIявусса кIанттурдайн, лахьлай ивкIун ур личIи-личIисса элмурду ва аьдатру. Мунан ххуйну кIулну бивкIун бур аьраб, парс, татар ва Дагъусттан миллатирттал сайки цинявппагу мазру. ЧIал къархьуну мунал цIа дурккун дур Да­гъусттаннал зунттавух. Муная ва мунал элмулия бавну, муначIан бувкIун бур ялун имамталну бу­ккан нанисса Гъази-МахIаммад, ХIамзат-баг ва Шамил: му хьуну ур миннал насихIатчину ва муаьллимну.
ЦIу ппурттуй цува муаьллимгу, мунал цIанихсса мюталинталгу ялапар хъанай бивкIун бур личIи-личIисса щархъаву. Амма 50-кусса шиннардия шинмай шамагу яхъанан ивкIун ур цачIу: Даргъуллал, Веденнал ва цайми-цаймигу шяраваллаву.
Гьантта бувккуну тIиссак­ссагу, ялу-ялун машгьургу, цIак­ьгу хъанан диркIун дур Жамалуттиннул цIа илданийх. Му кIантту хъинну къатIааьн бизлан бивкIун бур Аслан-ханнан. Хан тIалав буллан ивкIун ур муная мюридтуран тарикьат лахьхьин дуллалисса сянат кьаритаву. Жамалуттиннул цахра къавичIи дишин най ушиву бувчIусса ханнал му ивчIансса кьастгума лархIуну диркIун дур. Цала оьрмулун нигьачIишиву душиву чIалан бивкIсса Жамалуттин, кьабивтун Гъумучигу, цал ивзун ур ЦIахъарав, гиччагу яла – ШамиллучIан. Му ппур­ттуву мунацIун цIакь хьуну дур мяйжаннугусса щайхнал цIа, му ккалли увну ур Дагъусттаннал ва Мичиххичнал усттазну.
Щайх-Жамалуттиннул арс АьвдурахIман чичлай ур: «Ттул ссу Загьидат Шамиллул бувцуна цанма щарну ва цала кIивагу душгу буллуна щарну ттунгу, ттул уссингу. ХIасил, му чIумуяту шинмай Шамиллул ва ттул буттал кулпатирттая хьуна сайки ца кулпат».
Зунттал халкьуннал Аьра­сат­нащалсса талатаврил бакIчи­талну хьусса шамагу имам щайх-Жамалуттиннул мюридталну бивкIун бур. КIилчинма имам ХIамзат-баг ивкIуну махъ мунан кIанттай цIа рищун маслихIат буллалисса инсантал личIи-личIисса бивкIун бур. Миннаву ца яла лайкьману хIисав хъанай ивкIун ур хьхьичIсса кIиягу имамнал иширттаву хъинну цIа дурккун ивкIсса, мичиххичнаясса Ташав-ХIажи. Халкьгу мунахлу бацIан хIадурну бивкIун бур. Амма хъиривппа-хъиривсса махъ бивкIун бур Ухссавнил Ккавкказуллал бусурман умматрал рувхIанийсса бакIчи щайх-Жамалуттиннухь. Ташав-ХIажинал кандидатурагу махъаллил хьун дурну, мунал кка­ккан дурну дур махъсса шиннардий цачIава мюридну къуллугъ буллалисса, диндалул элмулуву итххявххун ккалаккисса ва дугърисса, кIусса хасиятгу дусса Шамиллул кандидатура. Му куццуй увчIуну ивкIссар Дагъусттаннал ва Мичиххичнал шамилчинма имам – Шамил.

Тархъаншиврул цIанийсса талатаврил цинярдагу шиннардий Шамиллул чIарав мудангу авцIуну ивкIун ур Жамалуттин. Оьруснащал буллалисса дяъвилийн цува къарщину ивкIун ухьурчагу (чIявусса халкьгу ливтIуну, ссайнчIав къабуккантIиссару тIий ивкIун ур бакIрайва Жамалуттин), амма дяъви сукку хьуну махъ му ивкIун ур Шамиллул яла хъунма маслихIатчину ва насихIатчину. Имамат паччахIлугърай Шамиллул дирхьуну диркIсса шариаьтрал гьанулийсса низамраву щайх-Жамалуттиннул диялсса гьурттушиву диркIшиврийнгу щак бикIан къабюхъайссар.

Гуржияйн ххявхсса чIумал Шамиллухьхьун ясирну багьну бивкIсса, кIиниязтал Чавчавадзе ва Орбелиани махъунмай зана битаврил, яни, хIакь буллуну, машан ласаврил хIакъиравусса маслихIатру ккаклай бивкIссар 1854-кусса шинал. Миннахлу оьруснал хIукуматрал итаба­кьин куну бивкIссар ясиршиврухьсса Шамиллул арсгу, ттурша мюридгу ва, му бакъа­сса, ялун дулун куну бивкIссар 40000 къуруш арцулгу. Амма ми кIиниязтал бувгьусса чIумалсса талатаврил гьурттучитуралмур тIалавшин тIурча, диркIссар ца миллион къуруширттал булара тIисса, дяъвилул давла хIисаврай цайхра цинявннайх дачIиншиврул. Шамил агьссар захIматшиврухун: гьай-гьай, хъинну ччай бивкIссар ясиршивруща цала арс ххассал ангу, амма арсналшиврий чIявусса инсантал цала хIалал бувсса давлалуцIа бавугу къатIайлану чIалай бивкIссар.
Шамиллулгу, гайми агьулданулгу дянивсса маслихIатчину увкссар мува щайх-Жамалуттин. Цинявппагу бавтIсса мажлисрай багьайсса махъгу лавхъун, халкьгу цала тIимуний бацIан бувну, Жамалуттиннул дурссар му кIанттул дя – итаакьин увссар кIиягу кIинияз оьруснал тIисса икьралданий. Цала кулпатирттащал ва ичIувазалтращал архIал Чавчавадзе ва Орбелианигу тархъан бувну, миннахлу зана ивтссар Шамиллул арс, итаакьин увссар ттурша ясир ва ялунгу ларсъссар 40000 къуруш арцул.
Дяъвигу къуртал хьуну, Шамилгу ясир увну махъ Жамалу­ттин лавгссар Туркнавун: миналулгу хьуну, яхъанан ивкIссар тиккува. Туркнавун нани ххуллий Жамалуттин ивссар Ттуплислив. Тикку му хъинну хъунмасса хIурматрай кьамул увссар ясиршивруща цала мурахас увну ивкIсса кIинияз Орбелианил щалагу кулпатрал ва мукуна бусраврай тIайлагу увкссар тичча Туркнавун.
Щайх-Жамалуттин аьпалу­хьхьун лавгссар 1867-кусса шинал ИстIамлив ва увччунугу уссар тиккува.
Дагъусттаннал ва щалагу Ухссавнил Ккавкказуллал тарихраву, бусурман диндалул ва элмулул аралуву хъунмасса кIантту бувгьусса му инсаннал цIа жура багьайссаксса лахъа-хъун дурну дусса ххай бакъару, бивщуну бу­сса ххай бакъару мунан багьай­сса кьимат. Жунма кIулсса ку­ццуй, МахIачкъалаливсса кIива бур учинсса проспектран дирзун дур щайх МахIаммад-Ярагъинал ва имам Шамиллул цIарду. Лажинни, къадизан лайкьссарив мукуннасса цIа Дагъусттаннал шамагу имамнал иман дирхьуну ивкIсса, щалагу Машрикьуллал билаятрайх цIа дурксса, Накьшибандийсса Ордендалул ца яла хьхьичIунма щайхну хъанахъи­сса Гъази-Гъумучиял Жамалу­ттиннул цIа?

Прапорщик Орбелианил дакIнийн бичавурттава

Цала бихьлахьисса хIара­чатрайн ва низамрайн бувну, Дагъусттаннал инсантурал кIулшилуву Шамиллул бугьлагьисса кIантту мадарасса бунугу, хьхьичIсса, шариаьт дахьа сакин дуллалисса чIумух бурувгун, Шамиллул чулухуннайсса фанатизм, мунал хъуншиврийнсса вихшиву утти, тани кунна, хъуннасса ва цIакьсса дакъар. Амма ур Дагъусттаннай инсан, тай цалчинсса имамтурал чIумуяту айивхьуну, хIакьинусса кьининингу, гьарца кIанттай ляличIиссава хIурматрай ва кьиматрай кьамул уллалисса. ХIалимну ва салихIну бутлатисса цала оьрмулийну, дакIнил чумартшиврийну ва узданшиврийну, куртIсса аьлимчушиврийну ва лявхъусса ля­хъиндалийну, шамагу имамнал муршид ушиврийну халкьуннаву мунал дур цIакьсса авторитет ва му ур хIисавну хъунасса мубаракнан.

Дагъусттаннал халкьуннавух ппив хьуну бур мунал оьрмулиясса цаннияр ца хIикматсса ва хIайрансса бусаларду, тIарду. Буслай бур, Аслан-ханнал му ивчIан кьаст лархIуну ивкIун, бувкIулия му малаиктуралли ххассал увсса тIий. Циминнанвагу ккавкссар тIар мунал симандалия бивзун нанисса, бухIангума захIмат хъанахъисса, чани, нур.
Жамалуттин увну ур Гъази-Гъумук, кIиккува яхъанайгу ивкIун ур дукIусса шинайн ияннин, яла ивзун ур Ссугърахьхьун. Мунал нясавгу дайдихьлахьисса дур МухIаммад-Идавсил (с.аь.с.) наслуну хъанахъисса саэдтурая.

Аслан-ханнал мунахьхьун дуллуну диркIун дур цаппара Кураллал шяраваллурду. Амма чIал къавхьуну, Жамалуттин махъаллил хьуну ур ми гьарца затирттаяту. Зана диртун ца­хьхьунна дуллусса ми щархъивгу, зун ивкIун ур ханначIа анжагъ мирзану, мунищала архIал хъинну агьну ивкIун ур дин-чаклихун ва Кьуран лахьлахьаврихун.
1829-кусса ва 1830-кусса шиннардий Жамалуттиннул цIа ппив хьуну дур щалагу Да­гъусттаннайх. Му чIумал Гъази-маллагу (Гъази-МахIаммад — 1-ма имам. — Р.Б.), так ца маллашиву дуллалаву дакъассагу, элмулуву мадара хьхьичIунай хьусса инсан ивкIун ур. Жамалуттиннул ляличIиссара аькьилшиврия хавар бавсса му лавгун ур кIаначIан Гъази-Гъумукун. Му ххуллухсса хьунабакьаврий Жамалуттиннул мунан дурчIин дурну Кьурандалул кьюлтIшивуртту ва хIикматшивуртту, бувсун бур бусурманнал Аллагьнайнсса вихшиврул ва мюридизмалул агьамшиврия ва дуллуну дур муна­хьхьун муниннин Гъази-малланан кIулнурагу къадиркIсса шари­аьтрал хIакъиравусса цалла чичрурдугу. Гъази-малла хъинну кьянкьасса хасиятрал ва аькьлулул заллу ушиву кIулсса Жамалуттиннул ганайн тапшур дурну дур инсантуравух шариаьт машгьур хьун дуллалаврил даву, амма мунищала архIал дирхьуну дур хъуннасса къадагъагу, оьрус­нащал дяъви ци чулийгу сукку бан къабучIиссар куну.

КуртIсса пикрирдавунгу лавгун, Гъази-малла зана хьуну ур Гимрилив. Зана хьуну махъ мунал хьуну дур кIира нюжмар кьатIув къауклай – я мизит­равун, я жяматрайн. Ахиргу, ца нюжмар кьини ув­ккун ур Гъази-мулла мизитравун бавтI­сса халкьунначIан. Ув­ккун хьхьичIунгу, ккалан ивкIун ур гайннахь шариаьтрал ва мюридизмалул хIакъиравусса вяъзарду – хъинну пасихIсса ва дюххансса такьвалий. БавтIми хIатта хъювсулгума бувккун бур. Мунал ми вяъзарду ккалан ивкIун махъ лап баххана хъанан бивкIун бур халкьгу: къужрал дахIлан бивкIун бур бакIурдийх чалмарду, жагьилминнал экьибутIлан бивкIун бур хIанттил гьарацIив, экьиличлан бивкIун бур къалиян ва таммаку. Мукун хIасул хъанан диркIун дур шариаьт ва мюридизм.
Дагъусттаннал халкь тIулуйн буцинсса кьасттирай ва хIакьсса дин-чак дуручлачи бансса мурадрай, му мазгьабгу сакин дурну, Жамалуттин ялагу зийна ивкIун ур цала багьу-бизулул иширттаха ва цукунчIав хIалагу ухлай ивкIун акъар щававххуну буллай сукку хьусса иширттавухгу ва дарихсса дахханашивурттавухгу. Ми иширттал бакIгу мунал дургьуну ивкIун акъар, цала мюридтал оьруснащалсса дяъви буллай байбишавугу мунан кьамулну бивкIун бакъар, аьдада чIявусса оь экьигьантIишиву чIалай. Яла махъ му хIарачатгума буллай ивкIун ур дяъви бацIан буван.

Цува ссалчIав ялув ивтсса, я ми къизгъинсса иширттавух хIала-гьурттусса акъанугу, Да­гъусттаннал миллатирттал мунал чулухуннайсса ччаву хIат-хIисав дакъа хъуннасса дур. На нава барану хьура ца чIумал Даргъуллал шяраву му хьунаакьлай, кьамул уллай бивкIсса куццул. Га шяравусса щала жямат, хъами, оьрчIру лечлай був­ккуна хьунин. Гьарма, гъан хъанай, ппай тIий ия ганал лаххиялул ссимиялттуйн. Ганан савлугъ дуллай, ваца хор бивхьусса кунма: «Ла илагьа ил Аллагь, дин имам Жамалуттин!» – тIий, лахъну тикрал буллай бия циняв. Циняв халкьуннангу чIалай, хъунмасса хIурматращал хьунингу увккун, ганал канийн ппай куна цала Шамиллулгу.
Хъиривмур кьини, сентябрь зуруй, нюжмар чаклил чIун къур­тал хьуну мукьах, га щарнил щалва жяматгу мизитравун бавтIун, бувккуна Жамалуттиннул вяъза. Га хъинну кIири ивчуну ва кьянкьасса мукъурттий айизлай ия Шамиллул мюридтурайн, гайннал ттигъанну Гъумук дурсса пасатшивурттайн. «Зул къуццу, хIакьсса шариаьтрал мюридтурал кунмасса бакъарча, марцIсса мурдалтурал кунма­сса бур!» – тIий ия га. Яла, кIура авну Шамиллул чулухунайгу, увкуна укунсса махъру:
«На вий та чIумалла къадагъа дихьлай уссияв, ма гьаз бара ярагъ оьруснайн къарщийну тIий, амма ина ттух къавичIи дирхьунни. На уттигу тIий ура вихь, бацIан бува дяъви тIий. Къабарча, мабара. Амма хъамагу мабитара цIана на вихьва чин нанимур. Агьаннав ина Аллагь­нал ва Идавсил нааьнаралун, агарда ина, та-бухьурчагу, я ина, я вил мюридтурал кьаст лахIирча бусурмантал хъямала буван, хIатта гай оьруснайн мютIисса бухьурчагума. Агьаннав ина нааьнаралун, агарда мюридизмалухсса хIакьсса ва марцIсса гъирарал цIаний акъа­ча, вила лахъа-хъуншиврул цIаний авцIуну ухьурча имамну. Нааьнаралун багьаннав вил лагмамигу, агарда миннал вихсса вичIи дишавугу так ца оьттухсса ва давлалухсса къанихшиврий­сса духьурча ягу мунихара лар­хьхьусса цайми-цаймигу затирттал цIанийсса духьурча».

Муния махъ халкь сайки щаллусса кьини, хъинну аьратталгу бувккун, булувкьуну чак­ру буллай бия.
Ттуя личIи хъанахъисса чIу­мал Жамалуттиннул увкуна: «Буси, ттул арс, оьруснахь, на, вайва бусурманнан кунма, гайннангу хъинбала чIа тIий ушиву. Кумаг баннав жунма цинявннанмагу ялувсса Заннал. На ура дарвиш ва малла, ттун кIулли, дин ца дакъанугу, жува циняв ца Заннал ляхъан бувсса бушиву. Мунияту жунма бунагьссар кувннан кув оьсса чIа тIун. Хъинну икIу, ца-ца чIумал дакIнийнгу улути Аллагьнал цIимилийну захIматсса ясиршивруща инава тархъан увсса инсан».

ХIадур бувссар
Руслан Башаевлул