Цалчинмур ЦIувкIратусса машгьурсса пагьламан Камил Маммаевлул цал уттигу цIусса рекордрайну тамашачитал хIайран бунни: буртти ивкIун мотоцикрайгу, ссур дунни хьхьуттайх.
Ттун Камиллул ва даву буттал шяраву дуваву ххуй дирзунни. ЧIявусса агьлугу шяравун батIин бунни. Ванал цала Телеграм-каналданий ччянива баян бувна цува март зурул 21-нний, Интнилхьхьунил байрандалул хIурматран, цIусса уникальнайсса номер ккаккан буван ччай ушиву пагьламаншиврул магьирлугъ цIу лаган дуваврил ххуллий. Камиллул цIусса номердания бувсунни чIявусса телеканаллал ва телеграм-каналлал. «Дагъусттан» РГВК-лул журналист Наталья Ханбабаевал сюжетрай кIицI лавгунни ва, хьхьуттайсса ванал цIусса номер, «трюк на байке» Гиннесрал рекордирттал луттиравун багьансса номер бушиву.
«Вести. Ставрополье» телеканалданий кIицI лавгунни укунсса гьунар уттинин Аьрасатнаву щилчIав къабувшиву. Машгьурсса блогер МахIач Аьбдуллаевлулгу (Телеграм-канал МЧС (Махач. Чё Стало?) кIицI лавгунни Аьрасатнал тарихраву мотоцикрай ссав мютIи дурсса иш уттинин къавхьушиву.
Барча дуллай буру жугу мотоцикрай бурттийсса пагьламаннал ца лахъазан уттигу. Камиллул гьунардания, даврия, гьуртту хьуцирив проектирттая жу уттинингу бувсъссия «Илчилий», балжину бувсун буссар сайтрайгу (https://ilchi.info/2023/03/avtor-47/), «Новый взгляд на будущее канатоходства» тIисса макьалалуву. Тавакъюри ва ссылка зунма кIулсса группардавун рутаву, бюхъайссаксса чIявусса агьалинан Камиллул ляличIисса гьунардания ва цIувкIуллал искусство ядувансса хIарачатрая кIул хьуншиврул.
Ядувансса куну, кутIа бувну кьабитангу къахьунссар, ядуваврицIун , цIусса гьунардайну цIу лаган дуллай, гьаз дуллайгу ур. Лайкьри Камил Дагъусттаннал лайкь хьусса артистнал цIанин. Ккуллал райондалул администрациялул хъуниминналгу, Культуралул управлениялулгу, ЦIувкIуллал активистътуралгу махъ ца бувну, Камиллул гьунарданун лайкьсса кьимат бищунссар тIий буру.
Суратру: Камиллул Телеграм-каналдания (https://t.me/balance05)
