Рамазан зурун хас бувсса мажлис Гъумук

[dropcap]М[/dropcap]арт зурул 21-нний Гъумук, райондалул администрациялул вакилталггу, жяматийсса ва динийсса ишккаккултгу, райондалул агьлу ва хъамалгу гьурттуну, бунни Рамазан барз бучIаврин хас бувсса райондалул мажлис.

Ва байбивхьуна Мубараксса Кьурандалул аятру дуккаврийну. Гъумучиял шяравасса, Дарбантливсса мизитрал имамну зузисса МухIаммад Майрановлул кIицI лавгуна Рамазан барз жува циняв Аллагь ТааьланачIан гъан буллалисса барз бушиву, исламрал дин цIакь хьуну чIярусса шинну гьарчагу, хIакьинусса кьинигу диндалия архсса агьлу бушиву, диндалул ххуллу-ххуттайн тIайла бацIан тачIавгу къачIалшиву.

Дагъусттаннал муфтинал хъиривчу Ах1мад МахIаммадов-лул бувсуна Рамазан зуруй зума дугьаврия цуксса мюнпат буссарив, ва дуаьрду кьамул дувай­сса барз бухьувкун, жува, Заннаха эбадат дуллай, дуаьрдай гьан буван аьркиншиву.

Рамазан барз кьиматрайсса барз бушивриясса, хьхьичIавасса заманнай ва зуруйн дачIи шинал хьхьичIва хIадур хъанай байбишайсса бивкIшивриясса, исламрал диндалул ххуймур буллан лахьхьин бувайшивриясса бюххансса ихтилат бувна ЦIуминалийсса имам Мансур Хаваевлул.

Лакрал райондалул хъунаманал хъиривчу Явсупи ХIамзаев­лул кIицI лавгуна Гъумучиял тарих бюхттулсса бушиву, Да­гъусттаннай «гъази» кусса цIа ялун ххи дурсса цамур шяравалу дакъашиву, ва хIуччалувагу чIалай бушиву цукунсса хIурмат бивкIссарив лакрал дянив диндалул чулийнмайгу, цайми миллатирттал Гъумучиял чулийнмайгу. Лакрал райондалул Имамтурал советрал хъунама МухIаммад Ссаламовлул барчаллагь увкуна дуллалицирив давурттаву кабакьу буллалисса райондалул хъунама Юсуп МахIаммадовлуйн, спонсоршиву дуллалисса Халкьуннал Мажлисрал депутат Марат Илиясовлуйн.

Ванал личIиссава барчаллагьрай кIицI ларгуна, кьурукIинттул, Гъумучи щин дакъа ливчIсса ппурттуву, агьали щинал дузал бувансса биялсса бюхъу-хIарачатрай къуццу тIий ивкIсса Жагьилтурал жяматийсса ккурандалул хъунама Тамерлан ХIабибуллаевлул цIа. Ванан Барчаллагьрал ча­гъаргу буллуна диндалул идаралул чулуха. Тамансса мюрщи оьрчIругу гьуртту хьуна мажлисрай, вайннал диндалул назмурду дурккуна. Дия вайннал диндалул кIулшивуртту ххал дуллалисса викторинагу, дия хьхьичIун ливчуминнансса бахшишругу.