[dropcap]М[/dropcap]арт зурул 21-нний МахIачкъалалив Культуралул дворецраву шадлугърал даражалий хIасиллу дунни «Лучший учитель родного языка и родной литературы – 2023» тIисса республикалул конкурсрал. Республикалул школарттал ниттил мазрал дарсирдал учительтурал магьиршиву ккаккан дуллалисса бяст-ччаллу най буссия март зурул 13 — 21-нний МахIачкъалаллал 11-мур гимназиялий ва Дагъусттаннал КIулшивурттал даража хьхьичIуннай даврил институтраву. Конкурсраву гьуртту хьунни республикалул 26 райондалиясса ва 8 шагьрулиясса 34 учитель.

– Жува ялапар хъанай буру, цалва-цалва мазру ва лугъатру ядуллалисса, чIявусса миллатру бусса билаятрай. Миллатирттал мазру хъанахъиссар жула культуралул ирсирал ца яла агьаммур бутIану. Тарихрал исват буллай бур ниттил мазрал чулухунмай биччи бакъулшиву дуллалисса миллатрал культура, багьу-бизу ва щала миллат бухлагайшиву. Мунияту, хьхьичIва-хьхьичI нитти-буттал, хъирив учительтурал аьркинссар оьрчIавун ниттил мазру лахьхьаврил чулухуннайсса ччаву рутан, – увкунни ДР-лул ХIукуматрал председательнал хъиривчу Муслим Телякавовлул.

ДР-лул Халкьуннал Мажлисрал КIулшивуртту дулаврил ва элмулул комитетрал председатель Елена Павлюченкол конкурсраву гьуртту хьусса учительтал барча буллай, кIицI лавгунни ва хъуннасса агьамшиву дусса конкурс хъанахъишиву.

– ХIакьину укун гьунар бусса учительтуран хъуннасса хъар лахъан багьлай бур школарттай оьрчIан ниттил маз лахьхьин баврил ялув. Жува ва куццуй ниттил маз, жула аьдатру, культура ядулларчанну талихIрайн буккантIисса, – увкунни Елена Павлюченкол.
ДР-лул кIулшивуртту дулаврил министр ЯхIия Бучаевлул барчаллагь увкунни конкурсрал сакиншинначитурахь,ва кIицI лавгунни, учительтурал пишалул даража гьаз баву мурадрайсса конкурсирттая хъунмасса мюнпат бушиву.

Гьашинусса конкурсрал бяст-ччаллаву цалчинсса кIану бувгьунни МахIачкъала шагьрулул 11-мур гимназиялул яруссаннал мазрал дарсирдал учитель МахIаммад Манаповлул, кIилчинмур кIану бувгьунни табасараннал мазрал дарсирдал учительница Лайла Рушульскаял ва шамилчинсса кIану – Къизилюртуллал шагьрулул 8-мур школалул яруссаннал мазрал дарсирдал учительница Шамеседо НурмахIаммадовал.

ДР-лул КIулшивуртту дулаврил управлениялул чулухасса дипломру ва арцуйнусса бахшишру дуллунни хьхьичIунсса кIанттурду бувгьусса учительтуран.
Шиккува кIицI лаган, хьхьи­чIунсса учитель язи угьлагьи­сса конкурс хьунни Расул ХIам­затовлул 100 шинал юбилейран хас дурсса мероприятиярттал лаг­рулий.