Райондалул бакIчи Юсуп МахIаммадовлул каялувшиндарай хьунни инттусса призыврайн дагьайсса батIаву. Муний гьуртту хьунни райондалул бакIчинал хъиривчутал, шяраваллал администрациярттал бакIчитал, аьра­лий комиссариатрал зузалт, цIуллу-сагъшиву дуруччаврил ва низам дуруччай органнал зузалт.

Юсуп МахIаммадовлул баян бунни апрель зуруя тийннай щалагу Аьрасатнаву дайдихьлай душиву интнил призыв ва му лахъи лаган тIий душиву июль зурул 15-ннийнин.
– Призыврал кампания дайдишиннин, жунна кIулну дикIан аьркинссар тагьар, хавар бикIан аьркинссар цими инсан уцин ккаккан увну уссарив. Аьралуннаву къуллугъ бан буцин ккаккан бувминнал сияхI дикIан аьркин­ссар хIадурну, – увкунни Юсуп МахIаммадовлул.

Райондалул бакIчинал мукунна чIурчIав дурунни, призывниктурал ккаккан дурсса гьарца справкартту ва документру хъинну хъирив лавну ххал бигьинтIий бушиву.
– Справкартту кьамул дуллан­тIиссар так лицензия дусса дуккаврил идарарттая», – увкунни Юсуп МахIаммадовлул.
Райондалул бакIчинал барчаллагь увкунни жагьилтал аьра­луннаву къуллугъ бан буцаврил ялув кIицI дансса даву дурсса Кьубиял шяраваллил бакIчи Артур МахIаммадовлухь, КIамахъаллал шяраваллил бакIчи Расул ЦIаххаевлухь, Гъумучиял шяраваллил бакIчи Мурад АьбдурахIимовлухь.

Хъирив аьралий комиссариатрал отделданул каялувчи Ажув Юсуповлул кIицI лавгунни цаппарасса шяраваллаву ссуттил­сса призыврал даву биттур дурну диркIшиву хьхьарану. «Гъан хьуну дур инттусса призыв. Жу зуйн шиккун оьвкуссар интнил призыврал ялув зуйва бивхьусса бурж биттур баншиврул. БувчIу-къабувчIусса кIанттурду къахьуншиврул, аькинссар повесткарду дулун так призывникнал цала кIунттихьхьун. Призыврал кампания нанисса чIумул мутталий аьркинссар кьянкьану зун. Аьралуннаву къуллугъ баврия махъаллил хъанахъима, кIункIу уллалиссар танмихIрайн, – увкунни ванал.