Ттигъанну МахIачкъалалив Правовая академиялул вакил Мариян МахIмудовагу гьурттуну Лакрал райондалул кIулшиву дулаврил управлениялул каялувчи Тамирлан МахIаммадовлул Ухссавнил Ккавкказнал юстициялул институтрал шамилчинмур курсирал студент, Гъумучиял шяраватусса Рамазан Айгумовлун дуллунни райондалул бакIчи Юсуп МахIаммадовлул чулухасса ХIурматрал грамота ва арцуйнусса бахшиш.
ДакIнийн бутанну, Рамазан Айгумовлул хьхьичIунсса кIану бувгьуну бивкIшиву ноябрь зуруй Къазаннал федерал университетраву хьусса Дунияллул халкьуннал дянивсса студентътурал ва аспирантътурал элмулул ва практикалул конвентрай. Мува куццуй, Рамазаннул 2-мур кIану бувгьуссия Ростоврай Ухссавнил Ккавкказнал вузирдал дянив хьусса «Актуальные проблемы экологического права» тIисса ккуркки столданийгу.
Гьунар бусса жула студентнал хьхьичIуннайшивурттал чIарах къаувккунни Лакрал райондалул бакIчи Юсуп МахIаммадовгу. Аьрасатнал лавайсса дуккаврил идарарттал дянив райондалул ва аьмну Дагъусттаннал кIулшиву дулаврил сий лахъ дан ванал бивхьусса захIматран кьимат бивщунни.
