Ниттил мазрал усттар

Жулла республикалий дайдирхьунни щалагу Аьрасатнал «Ниттил мазрал ва литературалул язима учитель – 2023» тIисса конкурсрал региондалулмур этап.

Конкурсрал региондалул этап дайдихьлахьисса шадлугъ хьунни мартрал 13-нний ДИРО-луву (Дагестанский институт развития образования). Ваний гьуртту хьунни Дагъусттан Республикалул КIулшиву дулаврил ва элмулул министерствалул Аьмсса кIулшиву хьхьичIуннай даврил управлениялул консультант Барият ХIажиева, ДИРО-лул ректорнал буржру чIумуйну биттур буллалисса АхIмад Кьурбанов, Ниттил мазурдил ассоциациялул председатель, шагьрулул 11-мур гимназиялул директор Зугьра Дибирова ва м.ц
Конкурс наниссар ДИРО-лул базалий ва МахIачкъала шагьрулул 11-мур гимназиялий. Конкурсрал региондалулмур этапрай гьуртту хъанай ур муниципал этапрай ххув хьусса 35 учитель. Вайннавух ур лакку мазрал кIия учительгу: Лакрал райондалийсса Уриннал школалул лакку мазрал учитель Сильвия ХIамзатова ва Ккуллал райондалийсса Къяннал школалул лакку мазрал учитель Сариана АьбдурахIманова.
Шиккува кIицI лаган, гьашинумур конкурс 16-мур хъанахъи­ссар. Ва ххуллухмур хас дурну дур Педагогнал ва насихIатчинал шинан.