«КIанттул сиптарду» республикалул программалул лагрулий ЦIуссалакрал райондалий ЦIуссачIурттащиял шяраву дан дакIний бур агьали бигьалагансса паркрал зона. Проектрал тIалавшиннардайн бувну, ва даву дузрайн дуккан дан республикалул субсидияртту дакъассагу, аьркинну дур кIанттул бюджетравасса, меценатътурал ва шяраваллил жяматрал дирчусса арцу. Ванийн бувну, проект щаллу даврил ялув бацIаву дуллалисса инициатив группа лабизлай бур жяматрайн, ва даврин ка-кумаг бан ччисса ухьурча, хIала буххияра тIий. Дагъусттаннал Экономикалул министерствалул конкурсрай вайннал проект хъин чулий ккаккарча, шяраву паркрал зона дантIиссар.