Мартрал 20-нний МахIачкъалалив Национал библиотекалуву хьунни Аьрасатнал чичултрал сюзрал член, шаэр Саэд Камиловлул 85 шинал юбилей кIицI лаглагисса аьпалул мажлис.
Шаэрнал пагьму ванаву ялун ливчун бур оьрмулул угьарасса шиннардиву. Ва хъуна хьуну ур ЧIяйннал шяраву. Зий ивкIун ур Ккуллал райондалул личIи-личIисса давурттай, хъунмурчIин культуралул идарарттай: художникну, музыка бищуну. Кулпат бувну махъ ивзун ур Каспийскалийн. ЧIярусса шинну дурну дур «Дагдизель» заводрай.
Ванал шаэршиврул ххуллу ккавкмуницIун, дунияллийсса иширттацIун бавхIусса бур. Уттинин дунияллийн бувккун бур «Интнил макьанну», «ДакIнил щаращул жюржу», «ЧIарагъи» тIисса жужру.
Шаэр дакIнийн утан мажлисрайн бувкIун бия Дагъусттаннал Чичултрал союзрачIасса лакралмур секциялул хъунама Илияс МахIаммадов, жяматийсса ва политикийсса ишккакку Шалласу Шалласуев, Дагъусттаннал халкьуннал чичу Мирза Давыдов, шаэртал, гъан-маччами, дустал, дуклаки оьрчIру.
Мажлис тIитIлай, Илияс МахIаммадовлул бувсуна шаэрнал оьрмулул ва творчествалул ххуллия. Хъирив махъ лавхъуна Шалласу Шалласуевлул. Ванал бувсуна шаэрнал оьрмулул лахIзардая, цала дусшиврийсса хIала-гьурттушиврия. Мирза Давыдовлул чIурчIав дурна шаэрнал назмурдай, вай халкьуннан дуккин бигьасса, оьрмулувасса, цанма ккавксса захIматрацIун дархIусса душиву. Махъру лавхъуна чичултрал, дустурал, гъанчунал, арснал ва душваврал.
МахIачкъалалив 26-мур школалий лакку мазрал учительну зузисса ПатIимат МахIаммадова бувкIун бия 27-мур,12-мур, 37-мур,16-мур, 51-мур школардаясса дуклаки оьрчIащал. Вайннал дурккуна шаэрнал чирчусса назмурду, щаллу бувна ччергъилттухун бюххансса балайрду.
Шаэрнал назмурдайсса балайрду щаллу бувна мукунма Лакрал театрданул артистътал Зульфия Архилаевал, Луиза Шахдиловал ва кулпатрал дус-ихтивар Шарапи Ажубовлул.
Ахирданий шаэрнал аьзизсса кулпат Аминатлул дакIнийхтуну барчаллагь увкуна бавтIцириннахь. Мажлис къуртал хьуна шаэрнал аьпалун тIивтIусса ссупралийну.
