«Интнил хьхьунил» асарду

[dropcap]Ч[/dropcap]Iявусса илгу тамашалийн бувкIун, хъуннасса сийлий шай гьарцагу шинал Лакрал театрданул «Интнил хьхьунин» хас дур­сса концертру, хъинну яргсса, авадансса дикIай мунил программа, аьдатрацIун бавхIусса балайрду, тIуркIурду, къавтIавуртту.


Ца базилух «Интнил хьхьунил» проект лайкь хьуссар Аьрасатнал Театрал ишккаккултрал союзрал сакин бувсса «Грани театра масс» тIисса щалагу Аьрасатнал конкурсрал дипломран «Лучший национальный праздник» номинациялий.
Биялсса захIматгу бивхьуну хIадур дурсса программа, ларгсса шинал къадурнура лирчIссия тай гьантрай, хасъсса аьралий операция сававну, жула лакрал кулпатирттал ялун оьзрурду бивну бушиврийн бувну. Мура сававрай къадурссар гьашину, дуллай аьдатсса ЦIусса шинал ва Хъаннил байрандалун хас дурсса концертругу. Хасъсса аьралий операция ттигу къуртал хьун бувар, оьз­рурдугу ялун найнма бур. Амма оьрму най бур цила кьаралданий. Щала миллат дягъулувун багьлагангу хъанай бакъар. Агьалигу тIааьн бакъасса хавардая шацI шаврил, чаннасса ва ххарисса асардах мякьну бур.

Хъунмур залдануву щяи­кIансса кIантту бакъа, ххисса кIантту бишин багьуна ва базилух «Интнил хьхьунил» концертрай. Циван ххирар агьалинан Лакрал театрданул программардаву ляличIинура «Интнил хьхьунил» концерт чирча, му так хъярч-махсарардал, тIуркIурдал, балайрдал ва къавтIавурттал авадансса душивруцIун, агьалинан дакIнийн рутай хъамадитала хъанахъисса аьдатру, европанал ва аьрабнал модалул жула оьрмулува дуккан дурну ларгсса миллатрал лаххия. Исвагьину даркьуну дия жула артистътурай чиллу-чухъри, бузмарду, чалагъайртту ва хара-лачакру, миннул лархминнал журат ххуй дуллай, цIу-цIанпIир ххи буллай бия.

Лакрал театрданул проектирдай гьуртту хьун гъирарай бучIай цIанихсса балайчиталгу, сахIналийн дахьва буклакисса балайчиталгу. «Интнил хьхьунил» программалул муданмасса хъамалли тамашачитурангу ххира­сса Бархъаратусса Тазарият Сулайманова, Дагъусттаннал халкьуннал артистка ХIабибат Буттаева, ЦIуссалакрал райондалул магьирлугърал къатлул къавтIалтращал, цIанихсса музыкантътурал династиялул вакил ХIанипа Дибиров, Равганият Сулайманова, Диана Кьадинаева. Ва базилух концертрай гьуртту хьунни Дагъусттаннал халкьуннал артистътал Лариса ХIажиева ва МухIсин Камаловгу. Цалгу увкунни дагъусттаннал магьирлугърал мусил фондравасса язими балайрду.

Программалий гьурттуну бия театрданул сайки цинявппа артистътал ва балетрал труппа. МиннацIун сахIналийн бувккун бия артистътурал оьрчIру ва оьрчIал оьрчIру, цал гьунар ирсирай нанисса. Вана Дагъус­ттаннал халкьуннал артист, театрданул хъунама режисссер Аслан МахIаммадовлул арснал арс, чIиви Садикь, цангу жуна хъамакъаитайсса Садикьлул цIа дирзсса, итнихасса санна ккалай. Байрандалул чIюлушиндалун ккалли бан бучIия жагьилсса ва театрданул ца яла хьхьичIунсса артистътурал Ислам ва Рукьижат МахIаммадовхъал душ Залина. Ца даркьуну дияча цийрагу миллатрал лаххия. Балайрдахун къавтIий, цищава бюхъайссаксса хIарачат буллай бия концертрал сий хъун дан.
ЛичIи бавияв ца яла язими номерду: МахIаммад Амировлул лакрал миллатрахасса балай, цувагу Дагъусттаннал магьирлугърал оьрмулуву хъунмасса хъар дургьуну бивкIсса Киров ва Гулизар Султановхъал, цал аьпа баннав, душнил Светланал арсри. Кировлуха лавхьхьуну авадансса чIу ва такьва.
Зунттал ратIал марцI щинал жюржулуха лавхьхьуну, цанни­цIун цагу бавкьуну, экьинанисса бия Зульфия Архилаевал ва Азиза АхIмадовал цачIу увкусса балай, цал бучIантIимур хьхьичI бусса балайчитал. Да­гъусттаннал вокалданул ттиркьюкьив учин бучIир вайннайн.
Шамсуттин Къаплановлул, Аьбдул Мурадовлул, Ямлихан ХIажиевлул, Ибрагьим Рабадановлул увкусса лакрал халкьуннал балай «Чаргудай». Концертрал яла яргмур номерну кIицI бавияв театрданул балетрал къавтIалтрал щаллу дурсса аслийсса лакку къавтIаву «Къирият», къуманал дакIру аьч дуллалисса, гьавас бутлатисса. Постановщик Аьрасатнал лайкь хьусса артист Муса Оздоев. Концерт дайгу-дирхьуну, къуртал дуруна Арслан Шагьмардановлул «Интнихасса» балайрдал хордай. Муданна кунна усттарну концерт дачин дурну бия Дагъусттаннал халкьуннал артистътал Шамсуттин Къапланов ва Саният Рамазанова.
Сайки шанна ссятрайсса концерт дайдирхьуну къуртал хьунцIа балайчитурахун руцлай бия цIа­нихсса музыкантътал: Арслан Шагьмарданов, Карин Кьадинаев (гармун), ХIусайна ХIусайнаев (зюннав), Ислам МахIаммадов (дачIу). ХIадур дурну дия концерт Аслан МахIаммадовлул ва Арслан Шагьмардановлул.