Аьвдулмажид Исмяилов
Ссутнил багъраву
Хъиншиву, марцIшиву гьархьхьуну ссавнил,
ЦIурттигу личIлулну ссутних ялугьлай,
Багърава бишлайсса дюхлулул хIукъу,
Зурул чаннай чIапIив щинавун зизлай.
Циваннив дакIгу дур, багъравун оьвтIий.
Мусил щин дурккусса ссутнил чIапIавун,
Багърал чIарав хIавзру арцул щиналу –
Щинал дагьанттуву сукку тIий барзгу.
Лажинни буссарив ванияр алжан:
ЩурщутIи багъраву хьхьувай навалу.
ХIавзравун нанисса щинал жюржулул
Макьан дурцуну дур ссутнил багъраву.
Лажинни, кьурукьрув,
уцара нагу…
М.-З. Аминовлул аьпалун
Къумасса пикрирдал ххюрхху увну най,
БакIщарницI авцIура, архнийн уруглай.
Ццах учин дунни дакI леххаврил чIурдал,
ЧантI увкусса яру ссахрив бур луглай.
«Кьурукьру, кьурукьру!» – вев кунни щиллив,
Пашмансса леххаврил дурцIунни ссавгу,
Левххуну бавчунни чуннив кьурукьру.
Чан-чанну арх буцлай шяраваллия,
ЧIурдугу бур дахьва вичIахух лехлай,
Хъама бивтун махъру, микIлавчIун уний,
Яругу циваннив бавчунни хъатлай.
Кьакьарттувусса къурхъ гужрай кьюлтIа тIий,
Хъавтусса яругу лишав каххурах.
Ччай бия левххун гьан, ччай бия вев тIун,
Ччай бия дакI дачIин пашман дустурахь.
Макьаитари тти навалу шикку,
Ччай бурча дакI дачIин, ссавний бунугу,
Лажинни, кьурукьрув, уцара нагу
Ва дунияллия чунай-унугу.
Виричунал цIагу цIакьну ядурну
Ризван Сулаймановлун
ЦIупартIи цIараву дяъвилул чуллай,
Ина цIа гьаз дунни цIанихну талай.
Душманнал ккуллардал щаращи дурсса,
Жун кIулли чувшиву нех лахълай дурсса.
Буттал улча ябан, никирал цIаний,
ЦIуцIаву кьюлтI дурну, неххал гьартаний,
Янил жавгьаргума хIайп къаувкуну,
Жул талихI ххассал бан ттупанг бувгьуну.
Лавмарт ккуллалуя хIучI къаувкуну,
Ццах бакъасса хъазам хьхьичIун бувгьуну,
Сулайманхъал Ризван, лирчIссар лакраву,
Вийн барчаллагьрайсса арсваврал ччаву.
Виричунал цIагу цIакьну ядурну,
Вил оьрму лавгунни лакран бусравну.
Чувшиврул барану зунттал дяниву,
Гьайкал дарцIуну дур буттал шяраву.
***
Ччех диркIунни лачак ниттил бакIрая,
ЛухIи барзу кунна кIяла зунчая.
Къювулул ххурххуппа каллай базурдайх,
Мюрш гъарал рирщунни меж диркIсса чIаврдайх.
Пакьирну, пукьлуву дуаьрду ккалай,
Мякьнура оьрчIарал чIурду къабаллай,
Дяъвилул щавурду дакIниву цIалай,
Ттигу дур аьсивну арсваврах луглай.
Самерахь
Хъахъи-пар хIаласса, ттул шайлул къюмай,
Шанавух, макIрагу вил чIу бур чIюхлай.
Ттул къурагьшиврийсса мюрш гъарал вирххуй,
ЛухIи-цIансса кьини гъилисса тIимуй.
Ттул имангу, дакIгу вил чулухуннай,
Ссутнил мурчал тIуркIуй хIаллил мурхьирдай.
Чурххавусса рухIгу абадлий хьурдай,
Вил кагу дургьуну, зунттал ххуллурдай.
Лешлай бур къалиян, мюрш гъарал лачIлай,
Вил базурдацIунгу яру бур лачIлай,
ДакIнил куртIнивату щугълурду бачIлай,
Гьавасрал асарду вищал кIибачIлай.
Яруннил хьхьириву щатIавун оькьлай,
Арнил тIутIал кьункьал алжаннувн акьлай,
Кьиблалийн бивхьусса зул тавханттуву,
Оьвкьунна, авссунна ттюнгъашивруву.
Уттигу цIан ларкьунни
Уттигу цIан ларкьунни
КIулушацIрал шяраву.
Къума лавгунни яру
Къумасса кIичIираву.
Чунайра тти ачайсса
ШанбачIулул дянива?
Левщунни ттунсса чирахъ
Зуннияту ччянива.
Вил цIан яруннил цIаний
ЦIан дагьунни дакIнивун.
Вил цIа баярча, утти
ЦIан дагьай яруннивун.
Интривав дайдихьлайсса
Инт дайдихьулул гьантрай –
Цалчинсса гъарал лачIлай,
Жул шяравугу шадлугъ:
Магъал макьанну руцлай.
ЦIусса гъарал цIу дувай
ЦIуцIаврил дургьу дакIгу,
Чуврив цIаннаву личIай
Вас-ццах хIаласса макIгу.
ТIааьнну зизлай кIунтIру,
КIизгу бур атил хъанай.
Ца къужлул чяхир хIарчIун,
БакIгу бур дахьва гьанай.
Интривав дайдихьлайсса,
КIинтниллив ахир хьусса.
Мюрш гъаралу бавцIуну
Душ бур виха лавхьхьусса.
Чаннасса кIунтIал парлий
Чанна шай дуниялгу,
Чув буривав кьюлтI хьуну
Чарин бувксса хиялгу?
***
Дуниял дащарчагу,
Вил цIания баргъ битай,
КIирил ччучлай унугу,
Вил чIарав дюхлу дикIай.
Бухьхьу ттул авлугадай,
Мякьну бур жула щавщи.
Вил хьхьичI тIиртIунна дуссар
Ттул дакI ва лакрал аьрщи.
Оьллаарнил махIлалухасса къюмай
Бурши
Илкинсса зунттаву, илданул кюруй,
Адаврал щаллусса барзунттал баруй.
Чувшиврий савсунал абадсса каший,
ВичIанни ттул аьрххи, бюхттулний Бурший.
Ххюлуссун
Вил кьадру гьаз буллай АпабакIул-Нур,
Сийлийсса вирттаврал лекъащай авур.
Щарних тамашалий Ччимирххяллух сун,
ТIиртIуну дур кьанийх алжан Ххюлуссун.
ЧIурттащи
ЧIюйлубакIул чIаврай чувшиврул минай,
Ттул хияллу вичIан уттигу бур най.
Ттул чIунархIал оьрчIал, дустурал аьрщий,
Кьамул ува ттигу лахъний ЧIурттащий.
КIулушацIи
Инсаншиврил минай, жул КIулушацIий,
Вил бучIантIимуний уссара дакI цIий.
ДакIниву абадсса адаврал къалай,
Гьавасрал уцIара вил сурат чIалай.
Читтур
Къириятрал куртIсса чиваркIуннал щар,
Ас бусса тIуллу дан бюхъайсса вищар.
Миллатрал мурадру хьунтIиссар биттур,
БакIуя дуруглай дуссаксса Читтур.
ТIулизун
Уссушиву хъун дан, дуруччин кIулсса,
Бишиннав барачат, кьимат кьамулсса.
ЧIа тIий ура кьисмат, буллугъшиву зун,
Арнилу адаврал кюруй, ТIулизун.
КIувур
ХIалурдал дазурдай, хIалбавкьу махIлай,
ХIаз буссаксса ура учIан тамахIрай.
Дуснайхчин гъан хьуну, хIурмат лахъсса бур,
Даража бюхттулсса зунттал щар КIувур.
ШавкIул
Уссал усттартурал цIа машгьур дурсса,
Ттул дустал кIинничалт ччаннай бавцIусса.
КъакIулманащалгу хьунтIиссара кIул,
Оьллаарнил ухний чумартсса ШавкIул.
ГьукIур
Мина дурну лахъну, хъун арнил дазуй,
Тамаша бувара цIунилгу на зуй.
Вил духIингу, яхIгу абадлийсса бур,
Чату ургарчагу ххал шайссар ГьукIур.
Гьущими
Щамарайх ппив хьусса хъин шяравалу,
КIулли къаличIансса кIикку навалу.
Ци багьу-бизулул хияллу бур мий,
Ххаллилсса вирттаврал минай, Гьущимий?
