[dropcap]М[/dropcap]артрал 18-нний ГьунчIукьатIрал шяраву кIицI ларгунни Хъарас щаврил байран. Ва ххуллухсса Хъурдаккаврил заллуну ия гьашинусса барачатрал кьуру цайнма кьамул бувну ивкIсса Къушиев НухI.

Гьарца чулуха тIиссакссагу, хIадуршиннагу дурну, ххаллилну тIайла дурккунни Хъузалал Кьини. Му эбадатсса байрандалувух гьурттушинна дан бувкIун бия личIи-личIисса кIанттурдая ххуй-ххуйсса хъамал.

[dropcap]Б[/dropcap]арачатсса шин чIа тIий, ялувсса Заннайн лабизлази­сса дуаьрттугу дурккуну, му эбадатрацIун дархIусса аьдатругу дурну мукьах диргьуна хъарас Хъун-Хъузалал, дуруна дялахърурду.
Муния махъ тIивтIуна Хъарас щаврил залуннал буллугъсса ссупра. Буллугъсса бия ссупрагу, буллугъсса дия цурда кьинигу, буллугъсса бия мажлисрай лахълахъисса махъругу, цаннайх цаннал дачIлачIисса ххуйшивурттугу, тIутIисса балайрдугу, дуллалисса къавтIавурттугу.
НТВ-лул журналист Оьмар МахIаммадовлул байрандалиясса репортаж ккаккан дурунни федерал каналданийгу.