«ИхIсандалул» даврин – лахъсса кьимат

Март зурул 21-нний Дагъусттаннал БакIчи Сергей Меликов гьуртту хьунни «РахIму-цIимилул дустал» тIисса ихIсандалул идарарттал Ассоциациялул сипталийну дуллалисса форумрай.

Шикку коммерциялул биялдарай бакъасса, идарар­ттал ларгсса шинал хIасиллу дунни ва социал масъалартту ххал бивгьунни. Республикалул хъунаманал кIицI лавгунни, шагьрулун агьамсса масъалартту гьаз бувтари, чара бакъа шагьрулул агьулданухь цIуххин аьркиншиву, граждан обществалул кабакьу бакъахьурча, шагьру хьхьичIунмай къашайшиву. «Масалдаран, – увкунни ванал, – Каспийскаллал ва МахIачкъалаллал агьалинахь цIухху-бусу бувну, исват хьунни щюллисса паркру, скверду чанну бушиву. Чара бакъа агьалинал мурадру хIисавравун ласунтIиссар, дагьайкунсса къулагъас вай масъаларттах дикIантIиссар», – куну.

[dropcap]М[/dropcap]еликовлул чIурчIав дунни ихIсандалул кумаграл фондрал хъунисса давуртту дуллай бушиву. Сириянаву зарзала дагьну, тайннал агьали кьини дур­ккун ливчIсса ппурттуву, кумаграл ка тIиртIусса дагъусттанлувтурахь барчаллагь увкунни. Бувсунни Меликовлул социал журалул проектирттаха зузисса НКО-лун паччахIлугъралгу шайсса кумаг буллантIишиву. «Друзья милосердия» Ассоциациялул председатель Тимур ХIажижараевлул бувсунни балжийну ларгсса шинал фондирттал дурсса даврия, аьмну дукIу 1, 25 миллиард арцул бавтIшиву ва 880 азара инсаннан кумаг бувшиву.

«Жул Ассоциациялувун багьлагьиссар чIярусса шиннардил мутталий хъуни-хъунисса давуртту дуллалисса фондру, медициналул, финансирттал кумаг буллалисса, дуки-хIачIиялул ва яхьунсса къатрал кумаг буллалисса. Так жулвар бусса элект­рон база «Доброфонд», билаятрай ккаккиялунну буссару», – увкунни ванал. МахIачкъала шагьрулул мэриялул ва НКО-лул дахIаврия бувсунни мэрнал къуллугъ бартбигьлагьисса Ризван ГъазимахIаммадовлул. «Утти­гъанну ттучIан бувкIуна Громовлул кIичIиравусса махIлардай яхъанахъими, цачIава тикку пух-пуссур, ччюрк дусса кIану марцI бувну сквер буван къабучIиссарив тIий. Жу циняв архIал бувккун гьарзат марцI дурну, лази-лакьи дуварду, тикку сквер буван тапшур бувссар, зунтIиссару вай гьантрай му даврихагу», – увкунни ванал. Вара кьини дия Аьрасатнал Минстройрал вакил, урбанист Святослав Муруновлул шагьрурдал оьрму хьхьичIунмай баврил чаранну ххал бигьлагьи­сса форумгу.