[dropcap]З[/dropcap]амана цукун, цумур чулухунмай баххана хьурчангу, учительнал пишалул мудангу агьамсса кIану бугьлай бур жула оьрмулуву. Учительтурал заманалуха лархьхьуну цалла пишакаршиву ларай давривугу ца яла хъунмамур кIану бугьлай бур «ДИРО» (Дагестанский институт развития образования») ДПО ГБУ-рал, хьхьичIва Учительтурал пишакаршиву ларай дувайсса институт тIий кIулну бивкIсса. Та-бухьурчагу, шиву зузисса лакгу къачанни. ХIакьину, Хъаннил байрандалун хасну, бусанну ва институтраву захIмат буллалисса кIива лакку душния.
Ккуллал райондалийсса ЧIяйннал шяравасса Залина Рамазанова зий бур шикку 2004-ку шиная шийнмай.
Бувну бур Залина МахIачкъалалив Багьатиров МахIаммадрашидлул ва Къараванил кулпатраву. Шагьрулул 31-мур школагу мусил медальданий къуртал бувну, 1999-ку шинал бувххун бур Дагъусттаннал паччахIлугърал педагогикалул институтравун. ЯтIул дипломрайну ва идарагу бувккуну, 2004-ку шинал бувкIун бур зун Педагогикалул кадрардал пишакаршиву ларай дувайсса Дагъусттаннал институтравун, шивусса даврищал архIал зий бивкIун бур шагьрулул 17-мур гимназиялийгу ингилис мазрал учительну. Шикку зун бувкIния шийнмай ва бур ингилис мазрал хъунмур преподавательну. 2011-ку шинал дурурччуну дур элмурдал кандидатшиврийнсса диссертация. 2016-ку шинал ва бувккун бур жагьилсса аьлимтурал дянивсса Республикалул «Жагьилсса аьлимчу – 2016» конкурсрал финалданийн. 2019-ку шинал ванин дуллуну дур доцентнал цIа. 2021-ку шинал Залина бивтун бур ДИРО-рал филологиялул ва социогуманитар кIулшиву дулаврил кафедралул хъунмурну.
ЦIанасса чIумал Залина МахIаммадрашидовна бур ДИРО-рал ЦРОО-рал (Центр развития общего образования) хъунмур пишакарну. Ванил сакин дуллай бур республикалул школарттай ингилис мазрал дарсру дихьлахьисса учительтурал пишакаршиву ларай даву мурадрайсса личIи-личIисса конкурсру, цуппагу гьуртту хъанай бур конференциярттай, семинардай. ХIакьину Залина бур мукунма ДИРО-рал Профсоюзрал комитетрал председательгу, Республикалул Ингилис мазрал учительтурал ассоциациялул членгу, ДИРО-рал Дуккаврил ва методикалул советрал секретарьгу.
Залинал ппу Багьатиров МахIаммадрашид оьрмулухун зий ур «Горгазрай», нину Къаравани – шанмагу душнил тарбиялулсса буллай шаппах. Залинал бур кIива оьрчI: душ дуклай бур 9-мур классраву, арс – 2-мур классраву. Ванил лас, цила шяравачу, Рамазанов МахIаммад Мусал арс зий ур МахIачкъала шагьрулул 1-мур азарханалий хIакин-хирургну. Залина барчаллагьрай бур цуппа даврий буна оьрчIру личIи-личIисса кружокирттайн, секциярттайн бувцуну заназисса, цинма кумаг буллалисса ласнал ниттийн Баниятлуйн. Мукунма барчаллагьрай бур цуппа дуккин баврил, оьрмулул ххуллийн тIайла баврил ялув захIмат бивхьусса нитти-буттайн.
Залинал бур кIива ссу – Светлана ва Альбина, вайгу, ларайсса кIулшивурттугу ларсун, жяматран аьркинсса давурттай зий бур.
КIундиннал шяравасса Анисат Хъунбуттаева зий бур шикку 2009-ку шиная шийнмай. Бувну бур Анисат Узбакисттаннай Оьмариев Шамиллул ва Зинатлул дянив. Заргалну зузисса Шамил, га чIумалсса чIявуми лак (хаснува кIундими) кунма, зий ва ялапар хъанай ивкIун ур Дянивмур Азиянаву. Аьпа биву, Зинат зий бивкIун бур медсестрану. Вайннал кулпат Дагъусттаннайн зана хьусса чIумал Анисатлун диркIун дур 6 шин.
МахIачкъалалив, Шамхал поселокрайн бивзун, шагьрулул 44-мур школалийн лавгун бур Анисат. Ва школагу марцIсса ххювардай къуртал бувну, бувххун бур ДГУ-рал чил билаятирттал мазурдил факультетрайн. Университетравусса дуккавугу ЯтIул дипломрайну щаллу дурну, най буна бувххун бур аспирантуралувун ва мунищала архIал зун бивкIун бур ва институтраву ингилис мазрал преподавательну. Кандидатшиврийнсса диссертация дурурччуну дур 2012 шинал. Анисат бур Республикалул ингилис мазрал учительтурал ассоциациялул член. Вагу, Залина кунма, зий бур личIи-личIисса конкурсру, семинарду бавриха.
Анисатлул бур ца душ – 11 шинавусса Милана. Ванин цила буттал, Мададлул, лажин ккаккан нясивну къабивкIун бур. Анисатлул ва Мададлул ташу бувну дурагу шин ва чIаравсса хьуну, Милана дунияллийн бувккун ца барз хьуну, оьрмулул ва аргъирал чагъиравусса Мадад аьпалул хьуссар. Ва райондалий ва республикалий ххуйну кIулсса, КIундиннал школалул директорну ивкIсса, аьпа биву, Хъунбуттаев Баширдул арсъя.
Анисатлул ппу Шамил «Илчи» кказитрал муданагусса буккур, цалва кьаландалула бувкмургу ук-тук гьан бувайссар ванал кказитрайн. Шамил хъанай ур КIундиннал шярава заргалнал пишарахун багьсса цалчинминнавасса. Ванал лахьхьин дурну, ванал хъирив най, цIанасса чIумал ва шяраву чIявур ва пишарахун багьми. Шамиллул даву лахьхьин дурсса 14 заргал хъанай ур, вайннавасса 2 дазул кьатIувгума зий ур.
Анисатлул бур ца ссу ва ца уссу.
Вай кIивагу лакку душ ца кабинетравугу щябивкIун бур, сайки ца давриха зийгу бур. Залинал ва Анисатлул сакин бувну бур дуккаврил цимивагу пособие, рекомендацияртту, чивчуну бур цимивагу элмийсса статья. Вайннал дуккаврил изданияртту, элмийсса захIматру ишла буллай бур махъа нанисса никиран кIулшиву дулавриву, вайннал элмийсса статьяртту тIурча, бивщуну бур Аьрасатнал ва Дунияллул лагрулийсса элмийсса журналлай. Вайннал итадаркьуну дур чил билаятирттал мазурдил дарсирдал учительтурал пишакаршиву ларай даврил курсирдал программартту. Душварал даву республикалул учительтурал пишакаршиву ларай даврицIун бавхIусса бунугу, вай мудангу бавцIуну бур цалва ялувгу. Цалла пишакаршиврул даража лавай баву мурадрай, гьуртту хъанай бур билаятрал ва дунияллул халкьуннал дянивсса даражалул лагрулий дуллалисса личIи-личIисса семинардай, курсирдай, конференциярттай.
Залинан ва Анисатлун кIиннинмагу ххирар Лакку кIану.
Хъаннил байрандалущалгу барча буллай, чIа тIий буру жулва ххаллилсса лакку душвавран оьрмулуву ва давриву хьхьичIуннайшивуртту.
