ЦIуссалакрал райондалийсса ТIюхчардал шяраваллил администрациялул бакIчи Башир Алхулаевлул, шяраваллил жяматращал хьунаавкьуну, ххал бивгьунни ДР-лул муниципал дуккаврил кIанттул сиптардал конкурсирттаву гьуртту хьуну, ми иширайну зузи бансса субсидияртту ласунсса проектирдавух хIала буххаврил масъалартту.
Жяматийсса контрольданул группалул председатель Оьмар Апанниевлул кIицI лавгунни жяматрал чулухасса яла цIюрувкьуми масъалартту ЦIуминалийсса ТIюхчардал шяраву оьрчIансса площадкалул, паркрал зоналул, оьрчIансса футболданул авлахърал строительстварду щаллу даврилсса бушиву.
Башир Алхулаевлул бувсунни ЦIуминалийсса Ц1уссалакрал райондалул щархъаву проектрал лагрулий дурсса мюнпатсса давурттая. БувчIин бунни жяматрахь хъуннасса ихтияр душиву кIанттул сиптардал конкурсраву гьуртту хьунсса агьамсса проектру язи дугьансса.
ТIюхчардал жяматрал, маслихIат ккавккун, язи дургьунни «Местные инициативы» паччахIлугърал программалул лагрулий дансса оьрчIансса майдандалул ва паркрал зоналул строительстварду. Мукунма сакин бунни паччахIлугърал программа иширайну зузи даву мурадрайсса мероприятияртту дачин дан кумагру буллансса сиптачитурал группа. Ва группалийн тапшур бунни конкурсраву гьуртту хьунсса проект хIадур дан ва чIарав бацIансса, арцуйнусса ка-кумаг бансса ишбажаранчитурал ва укунмасса инсантурал чулухасса гарантия дуллалисса чагъарду ласаву.
