«Ниттил маз кIулма талихI бумари»

Март зурул 15-нний «Дагестан» РИА-лий Дагъусттаннал кIулшиву дулаврил ва элмулул министр ЯхIия Бучаев хьунаавкьунни республикалул журналистътуращал. Ванал бувсунни КIулшиву дулаврил шин цукунсса даражалий ларгссарив, цукунсса хIасиллу хьуссарив. Бувсунни педагогтурал аттестация дуваву сантирай электрон журалийн дурцушиву, ларгсса шинал национал проект «КIулшиву дулаву» дагьайкун бартдиргьушиву.


– Школартту гьану­цIакул бакьин баврил программалия тIурча, 190 школалий (210 зданиялуву) дурссар ремонт, – увкунни ванал.
Гьашинусса шин Дагъусттаннай Педагогнал ва наставникнал шинну баян бувну бухьувкун, республикалул лагрулийсса 60 мероприятие хьунтIишиву ва ми давурттаха зунсса комитет хIасул бувну бушивугу бувсунни, ЕГЭ-лул хIакъиравурив министрнал цува мунил тарап дургьума ушиву кIицI лавгунни. – Цумур-цагу кIанттаясса, мурцIниясса бюхъу-хIарачат бусса выпускникнаща билаятрал ччимур вузравун уххан бюхълай бур, ларайсса кIулшиву ларсун, ххуйсса пишакар хьун бюхълай бур, – увкунни ванал.

Журналистътурал буллунни школарттай ниттил мазру лахьхьин буллалаврил хIакъиравусса суаллугу. ЯхIия Бучаевлул мас­лихIат бунни, ниттил мазру ябулланшиврул ва хьхьичIунмай булланшиврул школарттал театрдал ва оьрчIал лагерьдал бияла ягин буван. – Школарттай ниттил мазурдийсса постановкартту дулларча, оьрчIавун ниттил маз лахьхьаврихсса гъира багьлагьиссар, мукунма Дагъусттаннал культура лахьхьин дулларча, гъинтнил лагерьдай мюнпат бикIанссия. Ниттил маз кIулсса инсаннан кIулссар му цукунсса талихIрив, – увкунни министр­нал.