Вай гьантрай Ххюлуссуннал шяраваллил жяматрал лахъа-хъунну хьунаавкьунни хасъсса аьралий операция нанисса кIанттурдая ца-кIива гьантлий отпускалий итаавкьусса Акаев ХIажимурад.
Шяраваллил бакIчи ХIажимурад Акаев хьхьичIну ва хьунаакьин бувккун бия аьраличунал гъан-маччами, дустал, школалул дуклаки оьрчIру ва учительтал. БувкIун бия шагьрурдаясса ва лагма щархъаясса хъамалгу.
Оьрмулул 42 шинавусса ХIажимурад Акаев жула билаятрай мобилизация баян бувсса чIумал хушрай лавгссар аьралий операциялуву гьуртту хьун. Лакрал ва Ккуллал районная хьхьичIва-хьхьичI мобилизациялул бувминнавух вагу ивкIссар. Аьралуннавун хIадур увну махъ ХIажимурад Запорожуллал областьрайн тIайла увккун ур. ЦIанагу, хьхьичI ххуттай авцIуну, тикку къуллугъ буллай ур.
Мажлис хьуна Буттал кIанттул цIанийсса Хъунмасса дяъвилий ливтIуминнал гьайкалданучIа. Мероприятие тIиртIуна Гьарун Къунжуевлул. Хъирив ихтилат бувна шяраваллил бакIчи ХIажимурад Акаевлул. Ванал барчаллагь увкуна цалла куннасса цIа-бакI дусса къучагънахь, лайкьну къуллугъ буллай тIий, билаятрайн захIматсса кьини дурксса чIумал, мунил мурадру буруччин лавгун тIий. ЧIа увкунни цIуллу-сагъну, ххувшаврищал зана шаву.
Митинграй ихтилатру бувна ялагу: АьбдулхIамид Аьлишаевлул, МахIаммад-Ражав Абачараевлул, Маликаздар МихIадовлул, Жамилат Къунжуевал, Лаюса Исяевал, жула чемпион Ислам МахIачевлул буттал Рамазаннул ва м.ц.
– Жула билаятралгу, халкьунналгу мурадру буручлай, зула оьрмулунгу, цIуллу-сагъшиврунгу нигьачIисса тагьарданий лайкьну къуллугъ буллай буссару зу. Зул хIурмат жучIа хъунмассар. Жун пахру буссар виятугу, ина кунма аьралий операциялуву гьуртту хъанахъисса вил уссия Загьиди Акаевлуягу, вил ссурахъал Сабир ва Заур ХIусаниевхъаягу, вил гъанчу Шамил ва АхIмад Аьлишаевхъаягу. Аьралий операциялуву ина ккаккан дунни вила чувшиву, кьянкьашиву, – увкунни ихтилатчитурал ХIажимурадлухь.
Цала чулуха ваналгу барчаллагь увкунни щарнил жяматрахь аьралитурах дуллалисса къулагъасрахлу ва аякьалухлу. Бувсунни цала къуллугърая, жула аьралитурал къучагъшиврия.
– Цинявппагу та операциялуву гьуртту хъанахъиминнан гьарица кьини асар хъанан бикIай зул жуятувасса буруккин, зул дакI цIуцIаву, аякьа. Буттал къатлуя архсса чIумал хъуннасса ххаришиву дикIай, зу чIарав бушиву асар хъанахъийни. Яла-яла асар шай дакIнийхтуну чивчусса дуклаки оьрчIал чагъарду, – увкунни ХIажимурадлул. Ванал бувсунни цIу бутIуй бигьану къабивкIшиву, амма дагъусттанлувтурал цала чувшиву ва иширавугу ккаккан дуршиву ва дуллай бушиву.
Гихуннайсса мероприятие шяраваллил культуралул къатлуву хьунни. Шиккугу ца-кIива гьантлува махъунай, цува ивкIсса кIанттайн, гьантIисса ХIажимурадлухь ххуллухъин тIисса ихтилатру хьунни.
Аьралий операциялуву гьуртту хъанахъиминнан хас бувсса шеърирду ва цала чивчусса «СаллатIначIансса чагъарду» бувккунни дуклаки оьрчIал. Аьралийтурахьхьун була куну, вайннал буллунни ХIажимурадлухьхьун ми чагъарду.
