Ларгсса бигьалагай кьини МахIачкъала шагьрулул 8-мур школалул ттуплий буккай майданнив тIивтIунни Сиражуттин Илиясовлул завалунсса чIиви футболданул мяйлчинсса «Лакку улклул Кубок». Турнир дайдишин хьхьичI хьунни Аьрасатнал Виричу НурмахIаммад ХIажимахIаммадовлул аьпалунсса «Суперкубок». Муний ччалли дурккунни «Лакку улклул Кубок – 2022» турнирданий ххув хьусса Хъусращиял ва «Лакку улклул Лига – 2022» турнирданий ххув хьусса Ххутрал командартту. 6:3 счетращал «Суперкубок» бувххунни Хъусращиял командалул.
[dropcap]М[/dropcap]уния махъ хьунни 2023 шиналсса «Лакку улклул Кубок» тIитIлатIисса шадлугъ.
Муний гьуртту хьунни Халкьуннал Мажлисрал депутат Марат Илиясов, МахIачкъала шагьрулул депутатътурал собраниялул хъунама Марис Илиясов, ДР-лул аьрщарал ва хъуслил министрнал хъиривчу Эмил Ттаттаев, ДР-лул ХIукуматрал вакилтал, жяматийсса ишккаккулт.
Командарттан тIайлабацIу чIа увкунни Марат Илиясовлул.
Гьашинусса Кубокрай гьуртту хъанай дур Лакрал, Ккуллал, ЦIуссалакрал, Рутуллал ва Ахъушиял районнаясса, лакрал 43 шяравасса, 36 команда.
Тамашалийн бувкIми кIицI лаглай бур цалчинсса турнирдания шийннай цалнияр цал бюхттул хъанай душиву Лакку улклул кубокрал сий, сакиншиндарал даража ва гьуртту хъанахъиминнал усттаршиву.
