[dropcap]М[/dropcap]арт зурул цанний Дусшиврул къатлуву хьунни «СМИ ва граждан обществалул институтру» тIисса ккуркки стол. Ванил дайдихьу дуллалисса ихтилатраву республикалул национал политикалул ва диндалул иширттал министр Энрик Муслимовлул кIицI лавгунни Дагъусттаннал хъунама Сергей Меликовлул хъуннасса къулагъас душиву граждан обществаулул институтирттах.
– ХIакьину хасъсса аьралий ишру най бушивугу хIисавравун лавсун, СМИ-лул ва граждан обществалул институтирттал уртакьну зузаву цIакьсса дикIан аьркинни, магърибуллал билаятирттал службардал республикалийсса информациялул тагьар оьлукъин дувансса хIарачатгу бухьувкун. ДакIний бухьунссархха республикалий сентябрь зуруйсса ишру, региондалий гъургъаза дуван ччисса хIарачат. ЧIявусса миллатру ва личIи-личIисса динну дусса Дагъусттан Ухссавнил Ккавкказнаву яла хъунмур республика духьувкун, магърибуллал спецслужбардал къатIа бизан ччимур кIану жулла республика дур. ЖучIава хъанахъисса ишру миллатирттал ва диннал иширттан ккалли буллай бур, иш диннаву ва миллатирттаву бакъанугу, – увкунни министрнал.
Дагъусттаннал информациялул ва печатьрал агенствалул хъунаманал цалчинма хъиривчу Наида МахIаммадовал кIицI лавгунни информациялул дунияллий ларгсса шин республикалун къабигьасса диркIшиву.
– Хасъсса аьралий ишру байбивхьуния шийнмай жулла республикалийн информациялул гьужумру най бия. Жул агенствалул диялсса даву дурссар ва уттигу дуллайнма буссар, ми гьужумру байщун бувансса, ссаву ци буссарив аьщуйн щунну бувчIин бувансса хIарачатрай. Жагьилталгу гьурттуну чIярусса мероприятияртту дурссар. Жул биялдарайсса идарартталгу хIакьмур бусса куццуй чIалачIи бувансса давуртту дурссар. Жяматийсса ишккаккултрал давугу агьамссар ва ххуллий, – увкунни Наидал. Дагъусттаннал БакIчинал биялдарайсса, Граждан обществалул ва инсаннал ихтиярдал советрал хъунама Зикрулла Илиясовлул бувсунни миллатирттал СМИ-лул вара ххуллий дуллалисса давурттал агьамшиврия.
– Жулла республикалул ляличIишиву му дурхха, ци журалул ишру хъанарчагу, ми ишру миллатирттацIун бахIлахIисса. Ва кIанугу хIисавравун лавсукун, миллатирттал СМИ-лул бияла хъунмассар. Жунма дакIнийри 1999 шин, информациялул политикалух хъунмур къулагъас дусса чIун. Танисса хъуниминнал хIарачатрайну информациялул даву сантирайн руртссия.
ХIакьинугу республикалий вара махъ ца бувсса политикар аьркинсса, – увкуна ванал. МаслихIатрайсса ихтилатру бувна Бугьараминнал советрал хъунама Ибрагьим Ибрагьимовлул, захIматрал ва соцразвитиялул министрнал хъиривчу Аьбдулкарин Аьбдуллаевлул, «Агентство стратегических инициатив по продвижению новых проектов» тIисса идаралул вакил Зубайру Зубайруевлул, жяматийсса ишккаккултрал, аьлимтурал ва журналистътурал.
