Ниттил мазурдил кьинилий

[dropcap]Ф[/dropcap]евральданул 21-нний кIицI лагайсса Ниттил мазурдил кьини лайкьсса даражалий хьунадаркьунни Хасавюрт шагьрулул оьрчIал 4-мур садикрайгу. Шикку хьхьичIунсса гьурттушинна дурунни лакку душ Мариям Ибрагьимовал.


КIундиннал шяравасса Ибрагьимова Мариям Замирдул душнин дур дурагу 6 шин. ЧIивитIу ялапар хъанай бур Хасавюрт шагьрулий, занай бур шагьрулул «Звездочка» тIисса 4-мур оьрчIал садикрайн. Ниттил мазурдил кьини ва садикрай хьусса шадлугърай Мариямлул марцIсса бувчIинсса лакку мазрай дурккунни шяраваллил гимнран хIисавсса «КIундими» тIисса назму (КIундиннал культуралул къатлул директор Даниял ХIажиевлул чирчусса) ва бувгьунни 1-сса кIану.

[dropcap]М[/dropcap]ариямлун ва ванил кIивагу ссин ххуйну кIулли лакку маз. Вайннан лакку маз лахьхьаврилсса буллай бур буттал нину Камилат.
– Къушлий ихтилат оьрус мазрай баврий къадагъа дирхьуну дуссар. ТIайлассар, шагьрулул кIанай бигьану бакъар оьрчIан лакку маз лахьхьин буллан, ва мурадрал ххуллий гьарца кьини захIмат буллан багьлай бур. Маз буруччиншиврул хъунмасса хIарачат ва ссавур дикIан багьлай бур, вай дакъа ва даву дуван цукунчIав къабюхъантIиссар, циван учирча, жува ялапар хъанай буну тIий 30-нния ливчусса миллатру бусса республикалий. ЦIана (ччянива) циняв лак ялапар хъанахъисса лакрал шяраваллавугума оьрус мазрай гъалгъа тIий бур. Маз буруччаву хъанай бур лакрал миллатрал хIакьинусса ца яла хъунмур ва агьаммур буруккин, – тIий бур Камилат.

Шагьрулий бувсса, хъунма хъанахъисса чIивитIун захIмат хьун кунмасса махъру бусса назму душнища лахьхьин къахьунсса ххай бивкIун бур Камилат. Мариямлул ва лархьхьуну дур нюжмардул дянив.

Ларгсса шинал Хасав шагьрулул «Спартак» цIанилусса Культуралул къатлуву хьуну диркIссар миллатрал мазурдийсса назмурду дуккаврил конкурс, шиккугу 5 шинавусса Мариям ххув хьуссар, ларсъссар бахшиш. Мариям мукунма гьуртту хьуссар Инстаграмраву най диркIсса лакку мазрай назмурду дуккаврил конкурсрайгу. Мариямлун лакку мазрай чIярусса назмурду кIулну дур.

ЧIяву баннав лакраву Мариямлун ва ванил буттал ниттин Камилатлун кунма лакку маз ххирасса, кIулсса лак.