Февральданул 21-нний Ккуллал райондалул МКУ КДЦ-лул залдануву, Ватан дуруччултрал кьинилун хас дурну ва Аьрасатнал Виричу НурмахIаммад ХIажимахIаммадов аьпалул хьуну шин шаврин цIа куну, хьунни аьралий ва патриот ххуллийсса «Аьрасатнал Вирттаврая пахрулий» тIисса цIанилусса батIаву.
Ва дайдирхьуна Аьрасатнал Виричу НурмахIаммад ХIажимахIаммадовлул цIанийсса ДЮСШ-лул чIирайн лархъсса аьпалул улттуцI тIутIал шалкка ва Вирттаврал аллеялийсса суратирттацI тIутIив дишаврийну.
Аьпалул улттуцI тIутIал шалкка бивхьунни Ккуллал райондалул администрациялул бакIчи Шамил Рамазановлул ва Ккуллал ва Лакрал районнал Военкоматрал хъунаманал буржру биттур буллалисса Шималин Вагьабовлул.
БатIаврий гьурттушиву дунни райондалул администрациялул коллективрал, ЦIуллу-сагъшиву дуруччай управлениялул, шяраваллил, ххуллурдал хозяйствардал управлениярттал зузалтрал, хъамаллурал, райондалул жяматрал, дуклаки оьрчIал ва цайминнал.
Хъирив байбивхьуна культуралул ва патриот программалул агьаммур бутIа. Ваний, аьдатрайн бувну, хьхьичIмахъ лавхъуна Шамил Рамазановлул:
– Жува бавтIун буру хIакьину аьралий ххуллий цала бурж биттур бувссагу, буллалиссагу вирттал дакIнийн бичин. Райондалиясса цума-цагу виричунал цIа халкьуннал дакIурдиву абадлий личIантIиссар. Миннал цIарду дирзссар кучардан, идарарттан, школарттан ва мукунма цаймигу кIанттурдан. Вирттаврал чувшиврия, цIакьшиврия, вайннал дакIурдиву хIасул хъанахъисса бюхттулсса гьавасрая, жард къакуну дакьаврил цIаний оьрмурду харж буллалаврия кIулссар билаятрайцириннан. Жуламур бурж – вайннал кулпатру, гъанчу буруччавур, вайннал оьрчIан кIулшиву дулун, оьрмулуву цала-цала кIантту бугьан кумаг бавур, гьарцагу ишираву вайннал чIарав бацIавур, – увкуна райондалул бакIчинал.
БатIаврий махъру лавхъуна мукунма райондалул Хъунисриннал советрал председатель ТIагьир Абакаровлул, Виричунал буттауссу Малик ХIажимахIаммадовлул, отставкалийсса подполковник Щамхал Хизриевлул ва мукунма цайминнал.
Дакьаврил цIаний неонацистътуращал талай ливтIусса вирттаврах аьпагу куну, баян бува ца минутIрайсса пахъ багьаву.
Администрациялул бакIчинал программалул лагрулий мобилизоват хьуминнал кулпатирттан кумагран бавчIуна арцуйнусса конвертругу.
Хъирив дайдирхьуна райондалул Культуралул управлениялул зузалтрал хIадур дурсса концерт. Литературалул ва музыкалул композициялущал тамашачитурал хьхьичIун бувккуна Ваччиял оьрчIал багърал ва райондалул школарттал дуклаки оьрчIру. Къяннал школалул дуклаки душ Маммаева Баниятлул балжину бувсуна НурмахIаммад ХIажимахIаммадовлул оьрмулия ва аьралий ххуллия. Назмурду дурккуна Ххадижат Аминовал, Сиянат АхIмадовал, Басират ХIусайновал, ХIабибуллагь Кьурбановлул, Мустапа Маликовлул, Жавагьи Cулаймановал, Лариса Чупановал, Эльмира Чупановал. Къизлардал гимназиялул 11-мур классрал дуклаки оьрчI ХIажимурад ГулбахIандовлул ляхъан дурсса «НурмахIаммадлуха» тIисса назму дурккунни Басир Аьшаевлул.
Вирттавран хас бувсса, вичIидирхьуминнал иттав макь дучIан дуллалисса мукъурттий балайрду щаллу бувна РайхIанат ХIажиевал, Залиххал, Халисат Гудовал, Шавлухъ СалихIовал, Гулжагьра Рамазановал, Асият МахIаммадовал.
БавтIцириннал яла ххал дуруна НурмахIаммадлул оьрмулиясса видеоролик. Шиккува ккаккиялун бивхьуну бия вирттаврал дурсса къучагъшивурттая бусласисса луттирду ва альбомругу.
