[dropcap]М[/dropcap]арт зурул цанний Дагъусттаннал БакIчи Сергей Меликов гьуртту хьунни халкьуннал шаэр Расул ХIамзатовлун 100 шинал юбилейрал шадлугъирттал дайдихьу дуллалисса мажлисрай Оьруснал театрдануву.
Мажлис байбишин хьхьичI театрданул фойелуву Меликовлул ххал дунни шаэрнан хас дурсса выставка. Ккаккиялун дирхьуну дия ПатIимат ХIамзатовал цIанийсса магьирлугърал музейрал ва Национал библиотекалул фондирттавасса экспонатру. Шадлугъ дайдирхьуна Дагъусттаннал художник Халил-баг Мусаясуллул дурсса суратру ккаккан дуллалисса музыкалул ва поэзиялул композициялийну.
Меликовлул цала ихтилатраву кIицI лавгуна Расул ХIамзатов яруссаннал поэзиялуву бюхттулсса лахъазаннуну ивкIхьурчагу, тачIав так яруссаннал шаэрну къаивкIшиву, ва щалвагу Дагъусттаннал ва Аьрасатнал цIанияту чичлачисса вакил ивкIшиву. КIицI лавгуна Расул ХIамзатовлун тIайлабацIу хьушиву цува сагъну унийва классик хьунсса ва ванал щалла дунияллун тIивтIушиву Дагъусттаннал рувхIанийсса тавхана.
– Шаэрнал юбилейрал шадлугъру дувантIиссар федерал лагрулий, Москавлив ПаччахIлугърал Кремлилул чIалъаьлуву, Санкт-Петербургуллал Александринский театрдануву, Минскрай, Бакуй. Федерациялул Советрай дикIантIиссар ХIамзатовлул кьинирду, –увкунни Меликовлул.
Дагъусттаннал цалчинма президент МухIу Аьлиевлул кIицI лавгуна шаэрнал 100 шинал юбилей билаятрай лахъа-хъунну дуллай бушиву, мунал бюхттулсса гьунарданийн мукIруну бушиву ва шаэрнал щаллагу творчество патриотизмалул видурцIусса душиву.
Аьрасатнал Чичултрал союзрал правлениялул Председатель Николай Ивановлул, Расул ХIамзатовлул творчествалун лахъсса кьимат бишлай, кIицI, лавгуна ванал цIа щалвагу Аьрасатнаву машгьурну душиву, юилейгу гьар кIанай – Москавлив, Ураллай, Ссивирнаву, Архмур Востокрай дуллантIишиву.
Шаэрнал душнил, Дагъусттаннал магьирлугърал музейрал директор СалихIат ХIамзатовал барчаллагь увкуна билаятрал ва республикалул хъуниминнахь буттал творчествалухсса къулагъасрахлу. Хъирив ккаккан дурна республикалул культуралул министерствалул хIадур дурсса, юбилярнал оьрмулия ва творчествалия бусласисса видеосурат. Концертрал прогрраммалуву шаэрнал мукъурттийсса балайрду увкуна, ванал яла машгьурми произведениярттавасса бутIри ккаккан бувна.
