СунбатIуллал аьрщарай хьхьичIра дуссия Наримановлул цIанийсса колхоз. Му лирну мукьах сакин бувну буссар Гъази Оьмаровлул цIанийсса СПК. 2005-ку шинал жяматрал хIукму бувну, «КкунцIалу» тIисса ттизай оьллал ферма дуллуссар арендалий жула шяравучу Адамов Насруллагь АьвдурахIманнул арснахьхьун.
Учин бюхъанссар, ферма кIукун сантирай ччиманаща дачин дан къахьунссия куну. Фермалул цIагу дур «Агроферма». Давугу ялу-ялун лябукку хъанай, ххуй чулиннай ххуйсса бущилий най дур. КIиккува къатри, ппаллу лекьан къабивтун, муххал магъивгу дирхьуну, лайкьсса куццирайн дурцуну дур, хъалалазуни дишайсса лавкьусса базагу бувну. Зузалтрайн личIину гуж багьайсса давуртту дакъар, ризкьи канаки байсса щаллагу лухччинул лагмара ххал дургьуну, сакин увну ур «электрохIухчу», ми мугъаятну бур жанавартрая. Лухччал дазу дуссар 4 шяраваллищал: Ваччи, ЧIяйми, 2-мур ЦIувкIул, Ккул. Ппаллу буккан буллансса транспортер дур, оьллу ттизлай бур установкалий. Циняв къатрава, ризкьилул ппаллава ратIув най дур канализация. Бур нагь-нис дайсса цех. Фермалул территориялий дур ххуйсса марцIшиву, «Агрофермалий» зузиминнан дур аьркинсса шартIру. Хозяйствалий зий дур интернетрал связь.
ТIайланма учин, шяраваллил хозяйство нани дан жапасса жулва зунттал кIанттай, укун саргъунну зузи даву хъунмасса тIайлабацIулун ккалли бан бучIир. Вания эбрат ларсун зий лякъиннав жула зунттал аьрщарай цайми-цаймигу!
МахIмуд Аьлиев
ш.СумбатIул
