«ДакIнийхтунусса барчаллагь тIий буру ххаллилсса, чумартсса лакку душваврахь – Куллал райондалул ЗАГС-рал хъунмур Илиясова Сабринахь ва Лакрал райондалул УСЗН-лул хъунаманан кIанайсса Къюннуева Гьидаятлухь, кумаграх мюхтажсса къашавайсса оьрчIан мудан кумаг буллай, чIарав бацIлай буну тIий. Зу кунма, дакIру илкинсса, ка тIиртIусса инсантуралли дуниял ххуй дайсса. Зул дакIнил ццихь къаучиннав, каши ххи даннав».
Укунсса чагъар бувкIунни жул кказитрал редакциялийн Дунияллул халкьуннал дянивсса Исламрал бизнесрал ассоциациялул президент Марат Кабаевлуя ва ванал маслихIатчи Разита Мусаевая.
Мюхтажнан кумаг баву чириссар, АллагьначIа бучIи лякъайссар учай. Хъиннува хъунмасса чири бухьунссар къашавайсса оьрчIан бувсса кумаграя.
«Цуксса хIайпнугу, чансса бакъар хIакьину онкологиялул къашавайсса, чил кумаграх ялугьлагьисса оьрчIру, буруккинттарал бувгьусса нину- ппу. Та, ци аьркинну буккарчагу вайннайн, щаллу бай мурад», – тIий бур цуппагу укунсса оьрчIал цIуллу-сагъшиврул ялув чялишну сукку тIисса Разита.
Сабрина бур Ккуллал райондалий ххуйну кIулсса, райондалул жяматран нукIува бусрав хьусса инсан. Ванил ппу ХIажияв МахIаммадов райондалийгу, республикалийгу хIурматрайсса адамина ивкIссар. Цала тIайлашиврийну, чумартшиврийну ххира хьуну ивкIссар жяматран. ХIакьинусса кьинигу ХIажияв дакIнийминнал бусраврай зумух ласай ванал цIа. 1992-ку шинал Ккуллал школагу къуртал бувну, Сабрина бувххун бур финансирттал ва экономикалул колледжравун, мунияр махъ – Дагъусттаннал университетрал юридий факультетрайн. Дуклай бунува зий бивкIун бур Ккуллал райондалул Сбербанкрай оперотделданул хъунмурну. Ххюра шин миккугу дурну, бувкIун бур райондалул казначействалийн. Шикку зий бивкIун бур 1997-ку шиная 2014-ку шинайн бияннин. Мунияр махъ жаваблувсса, бажар бусса Сабрина райондалул администрациялийн хъунаманал хъиривчуну бувцуну бур. Шикку зий бивкIун бур 2014-ку шиная 2018-ку шинайн бияннин. 2018-ку шинал ванийн тапшур бувну бур райондалул ЗАГС-рал отделданул хъунмунил къуллугъ. ЦIанагу шикку зий бур.
– Ттул ппу сайки 30 шинай судрал председательну ивкIссар. Дагъусттаннал лайкь хьусса юристъя. Цувагу ятинну хъун хьусса, чIявусса ккавксса уну, гьарнан кумаг бан чялишсса икIайва. Цала каши ишла дурну, чIявусса инсантурал чIарав авцIуссар. Бюхъай, буттал хасият ирсирай ттуйнгу дирну дикIан. Бутта ттун оьрмулухун эбратну хьуссар, – тIий бур Сабрина.
Гьидаят Къюннуева Гъумучасса бур. Гъумучиял школа къуртал бувну махъ бувххун бур Дагъусттаннал университетрал филологиялул факультетрайн. Вагу ЯтIул дипломрай къуртал бувну, зий бивкIун бур Гъумучиял школалий лакку мазрал ва Дагъусттаннал литературалул дарсру дихьлай. Махъсса мяйра шинал лажиндарай ва зий бур Лакрал райондалул УСЗН-лий. ЦIанасса чIумал Управлениялул хъунаманан кIанай бур. Ва давугу ванил цила хасиятрацIун даркьусса дур.
Гьидаят бур дакI хъинсса, аьчухсса, цаманал буруккин лаласун кIулсса инсан.
Ялун нанисса хъаннил байрангу барча дуллай, чIа тIий буру Сабринан ва Гьидаятлун цIуллушиву. Зу кунмасса инсантал чан къабаннав жула дянив.
