Жулла лакрал щархъавасса къачансса жагьилтал гьуртту хъанай бур Украиннай нанисса хасъсса аьралий операциялий. ВицIхъиял махIлалий дакъагу, Лакрал райондалийгу ца яла хъуннамур шяраваллин ккаллисса КIундиннал шярава шикку гьуртту хъанай ур 6 жагьил. Ватан дуруччайминнал кьини, февральданул 23-нний, КIундиннал школалий хьунни СВО-лий гьуртту хъанахъисса жагьилтуравасса цаннащалсса, захIматсса щаву дирну, утти цайна цува укIлакIисса, чIал къавхьуну махъунай ачин нанисса Муслим Абачараевлущалсса хьунабакьаву.
Ва батIаврил сакиншинначиталну бия КIундиннал школалул коллектив ва дуклаки оьрчIру, директор Абакар Гуйдалаев, оьрус мазрал ва литературалул учитель Абризат ХIажиева бакIчину.
Вирттавращал хьунабакьин ва кьини, школалул коллектив, дуклаки оьрчIру ва щарнил жямат бакъасса, бувкIун бия вара шяравасса 1-мур ранграл капитан, цIанасса чIумал Каспийск шагьрулийсса «Дагдизель» заводрал генеральный директорнал хъиривчу Геннадий Кьурбанов, шяраваллил бакIчи МахIаммад МахIмудов, Шамхаллая хасну ва батIаврийн увкIсса пенсионер Шамил Оьмариев, шяраваллил жяматрал оьрмулувух хьхьичIунну гьуртту хъанахъисса Низами Умаров ва чIявусса цаймигу. Бусравсса хъамаллуравух бия Лакрал ва Ккуллал районнал военком ХIасан Массуев ва Лакрал райондалул КIулшиву дулаврил управлениялул начальник Тамирлан МахIаммадов. Хъамаллурал цинявнналвагу лавхъуна махъру. Ихтилатчитал чIурчIав дуллай бия хIакьину жулва жагьилтурал дуллалисса къучагъшивурттай. Тамерлан МахIаммадовлул цалвамур ихтилатраву кIицI лавгуна КIундиннал школа райондалий гьарцагу ишираву хьхьичIунну буккайшивугу. БавтIминнал гъирарай вичIи дирхьуна тарихрал учитель Шихлаев Аьбдуллул гьарта-гьарзасса ихтилатрах. Махъ лавхъуна цалва Муслим Абачараевлулгу.
Учительтурал ва дуклаки оьрчIал хIадур дурну дия культуралул хъуннасса программа. Ва кьини оьрчIал, вирттал байрандалущалгу барча бувну, дурккуна назмурду, увкуна балайрду, бивзуна къавтIун. Школалийсса хъунмасса интерактив экран ва компьютерду ишла бувну, цинявнналагу архIал ххал дурна ва кьинилун хасъсса суратирттал ва видео материалгу. КIира ва чIаравсса ссятрайсса хьунабакьаву – Чувшиврул дарс, хьуна дакIний личIансса.
КIундиясса жагьилтал, вайннавух Муслим Абачараевгу, СВО-рай гьуртту хъанай бур яла захIматсса, яла нигьачIисса кIанттурдай. Муслим хасъсса аьралий операциялий ккаккан дурсса чувшиврухлу лайкь хьуну ур «За отвагу» ва «За воинскую доблесть» медаллан.
Ислам Аьлибуттаев ва Казбек Массуев – «За отвагу» медальданун.
ЧIал къавхьуну махъунай ачин нанисса Муслимлухьхьун дуклаки оьрчIал ва щарнил жяматрал буллуна аьрайминнансса ссайгъатру, вайннал дакIру дуллалисса, цIуллуну-сагъну ва ччясса мутталий ххувшаврищал шаппай зана шаву чIа тIисса мукъурттищалсса чагъарду.
Мажлис гихунмай лахъи лавгуна ссупралух. КIундиннал шяравасса заргалтурал чулуха хIадур бувну бия барачатсса пулаврал къазан-кIункIур.
Школалул директор Абакар ХIамзатович хъунмасса барчаллагьрай ур цанма ва давриву ва цайми-цаймигу кIанттурдай кумаг буллалисса Низами Умаровлуйн. Шиккува кIицI лаган, Низамил ва батIаврийннин хIадур дурну дия шяравасса къучагътурал суратирттащалсса хъуннасса баннергу.
