Ватан дуруччултрал кьинилул хьунийн «Россия – моя история» тарихрал паркраву хьунни патриотическийсса мероприятие «Героями богата дагестанская земля».
Му сакин дурну дия «Единая Россия» партиялул чулухасса Аьра­сатнал ПаччахIлугърал Думалул депутат Султан ХIамзаевлул кумаграйну.

Хас дурну дия мероприятие Буттал кIанттул цIанийсса Хъунмасса дяъвилий гьуртту хьуминнан ва Украиннал аьращарай хIакьину нанисса хасъсса аьралий операциялий гьуртту хъанахъиминнан, вайннал эбратрайну, хъирив нанисса никиран ватан ххирашиврухсса бургаву ва пикрирду цIакь баву мурадрай.
Султан ХIамзаевлул кумагчи Наира ХIажимахIаммадовал кIицI лавгунни Дагъусттаннал агьулданучIа даингу бюхттулсса кIанттай бивкIшиву вирттаврал аьпа буруччаврил хIурмат.
Къизгъинсса талатавурттаясса ветерантурал дакIнийнбичавуртту – вана Дагъусттаннал агьалинал чувширия бусласисса хIакьсса уттавасса тарих.
– Бусалардавун багьсса вирттал – Совет Союзрал КIийла виричу, цал цIанил душманнал дакIурдивун ццах бутлай бивкIсса летчик-ас АхIмад-Хан Султан, Рейхстаграй ттугъ бивщусса Исмяил АьбдулхIакимов, жула заманнул вирттал МахIаммад НурбахIандов, НурмахIаммад ХIажимахIаммадов, Энвер Набиев – вайннал цIардал тасттикь буллалиссар Дагъусттан хIакьсса вирттаврал ватанну бивкIшиву ва личIантIишиву. «Гьантта-чIумул дагьанттуву личIантIиссар вайннал аьпа, жула билаят хьхьичIунмай баврил ххуллийсса гужру жувува цачIун буллай», – увкуну бия Султан ХIамзаевлул мероприятиялий гьуртту хъанахъиминнайнсса цала оьвчавриву.
Залданувун бавтIун бия личIи-личIисса шиннардий дяъвилул иширттаву гьуртти хьуми, 1999-ку шинал Дагъусттан чапхунчитурацIа марцI буккан буллай бивкIми, хIакьину Украиннал аьрщарай нанисса хасъсса аьралий операциялий чувшиврий жанну дуллуминнал ва гьуртту хъанахъиминнал мачча-гъанми, властьрал вакилтал, жяматийсса ишккаккулт, студентътал ва дуклаки оьрчIру.
СВО-лия щаву дирну увкIсса Каспийскаллал хьхьирил пехоталул батальондалул коман­дир Идрис Кьурбановлул бавтIминнахь байрангу барча дурну, барчаллагь увкунни аьралитуран буллалисса кумаграхлу.
ПаччахIлугърал ва жяматрал чулухасса чIарав бацIаврилли аьралитуравун хьхьичIунмай бачинсса гьавас бутлатисса, – тIий ур аьраличу. Яла-ялагу оьрчIал чагъардал дакI дацIан дуллай бур тIар ххувшаврийн.
«Боевое братство» ккурандалул каялувчи, аьралий иширттал гьурттучи Мусащайх Салмановлул кIицI лавгунни жува абадлий пахрулий бикIантIишиву дакьаврил цIаний жанну дуллусса жула ватанлувтурал виричувшивурттая. «Тайннаясса аьпа буруччиншиврул жува аьркинссар дуруччин жула цашиву. Къабагьаннав жула жагьилтуран ярагъ кIунттил бугьан. ХIакьину тIурча вайннал яла къалагайсса буржну хъана­хъиссар ватандалул ххуллий жанну дуллуминнал ниттихъах аякьа даву», – увкунни Мусащайх Салмановлул.
Хасъсса аьралий операциялий чувшиврий жан дуллусса Аьбдулла АьбдурахIмановлул буттал Ирасхан АьбдурахIмановлул бавтIминнахь байрангу барча дурну, барчаллагь увкунни вирттаврал аьпа буруччинсса давуртту дуллай бушиврухлу.
– Паракьатну личIаннав жула ялув ссав. Жу пахрулий буссару жула оьрчIал виричувшивурттая, му жул тарбиялул биялар. Дагъусттанлувтал мудангу бацIантIиссар ватандалул махъ, иш багьарча жу ниттихъулгу бацIантIиссару жула оьрчIал чIарав, – увкунни хасъсса аьралий операциялий чувшиврий жан дуллусса Банас Кутурчаевлул ниттил Умирза Кутурчаевал.
Хаъсса аьралий операциялий ливтIуми дакIнийн бивчунни ца минутрайсса пахъ багьаврийну.
Мероприятиялий щаллу бунни патриот журалул балайрду ва шеърирду, ми балайрдахун ккаккан бунни къавтIаврил композияцияртту.